राष्ट्रपति भण्डारी र गृहमन्त्री खाँणबीच भेटवार्ता, के बिषयमा भयाे छलफल ?

काठमाडाैं । गृहमन्त्री बालकृष्ण खाँण र राष्ट्रपति विद्यादेवी भण्डारीबीच भेटवार्ता भएकाे छ ।

गृह मन्त्रालय स्रोतका अनुसार बिहीबार अपराह्न गृहमन्त्री खाँण राष्ट्रपति भण्डारीलाई भेट्न शीतलनिवास पुगेका थिए ।

राष्ट्रपति भण्डारीले गृहमन्त्रीसँग मुलुकको पछिल्लो सुरक्षा अवस्था तथा देशका विभिन्न भागमा आएको बाढी, पहिरा र डुबानका बारे जानकारी लिएकी थिइन् ।

यस्तै, राष्ट्रपतिले दार्चुलामा तुइन तर्ने क्रममा महाकालीमा बेपत्ता भएका जयसिंह धामीको घटनाबारे पनि चासो राखेको बुझिएको छ । 

धामी बेपत्ताबारे छानबिन समितिको निष्कर्षका आधारमा आवश्यक कूटनीतिक पहल गर्न गृह मन्त्रालयले बिहीबार परराष्ट्र मन्त्रालयलाई पत्राचार गरेको खाँणले राष्ट्रपतिलाई जानकारी गराएका थिए ।