धमाधम राजनीतिक नियुक्ति पाउँदै नेपाल पक्ष, रेल्वे कम्पनीको महाप्रवन्धकमा निरन्जन झा नियुक्त

जनकपुरधाम । कांग्रेस सभापति शेरबहादुर देउवा नेतृत्वको सरकार गठनमा निर्णायक भूमिका खेलेको माधवकुमार नेपाल पक्षले धमाधम राजनीतिक नियुक्ति पाउन थालेको छ ।

सरकारले बिहीबार बागमती प्रदेशको प्रदेश प्रमुख विष्णुप्रसाद प्रसाईंलाई हटाएर माधव नेपालको सचिवालयमा लामो समय काम गरेका यादव शर्मालाई नियुक्त गरेको छ। 

यस्तै, बिहीबार नै नेपाल नेतृत्वको एमाले समाजवादीले नेपाल रेल्वे कम्पनी लिमिटेडको महाप्रवन्धक पद पनि पाएको छ ।

हिजो बसेको मन्त्रिपरिषद बैठकले सप्तरीको सदरमुकाम राजविराज नगरपालिका वडा नम्बर १ निवासी नेकपा एमाले समाजवादीका नेता निरञ्जन झालाई नेपाल रेल्वे कम्पनी लिमिटेडको महाप्रवन्धक पदमा नियुक्त गरेको हो । 

यसअघि केपी शर्मा ओली नेतृत्वको सरकारले नियुक्त गरेका महाप्रबन्धक गुरु भट्टराईलाई अहिलेको सरकारले स्पष्टीकरण सोधेपछि उनले स्पष्टीकरण नदिई राजीनामा दिएका थिए ।