मुख्यमन्त्री पदबाट शंकर पोखरेलले दिए राजीनामा

काठमाडौं । लुम्बिनी प्रदेशका मुख्यमन्त्री शंकर पोखरेलले पदबाट राजीनामा दिएका छन् । प्रदेश सभामा दर्ता भएको अविश्वासको प्रस्ताव छल्न उनने बुधबार मुख्यमन्त्रीबाट राजीनामा दिएका हुन् ।  

कांग्रेस, माओवादीसहितका सांसदहरुले दर्ता गरेको अविश्वासको प्रस्तावमाथि छलफल गर्न र निर्णय लिन बोलाइएको प्रदेश सभाको विशेष अधिवेशन सुरु हुनु अघि नै उनले मुख्यमन्त्रीबाट राजीनामा दिएका हुन् । 

पोखरेलले प्रदेश प्रमुख अमिक शेरचनलाई राजीनामा बुझाएको एमाले प्रमुख सचेतक भूमिश्वर ढकालले बताए ।

मुख्यमन्त्री पोखरेल अल्पमतमा परेका थिए । उनको विपक्षमा ४१ जना सांसद छन् भने पक्षमा एमालेका ३८ सांसद मात्रै थिए । आज प्रदेश सभामा उनीविरूद्ध परेको अविश्वास प्रस्तावमाथि छलफल हुँदै थियो ।