माओवादीभित्र आन्तरिक झमेला, स्थायी समितिको बैठक स्थगित

काठमाडौं। नेपाल कम्युनिष्ट पार्टी (नेकपा) माओवादी केन्द्रको स्थायी समिति बैठक स्थगित भएको छ।

आज दिउँसो ३ बजे पेरिसडाँडामा बस्न  तय गरिएको बैठक आन्तरिक तयारीका लागि भन्दै स्थगित भएको पार्टी कार्यालय सचिव श्रीराम ढकालले बताए।आजको बैठकबाट सरकारमा सहभागी मन्त्रीको नाम टुंगो लगाउने तयारी थियो । यसअघि आइतबार पनि पार्टीको स्थायी समिति बैठक बसेको थियो।

कांग्रेस सभापति शेरबहादुर देउवा नेतृत्वको वर्तमान सरकारमा हाल जनार्दन शर्मा र पम्फा भुसाल मन्त्री छन्। शर्माले अर्थ मन्त्रालय र भुसालले ऊर्जा मन्त्रालयको जिम्मेवारी पाएका छन्। माओवादीले अझै सात मन्त्रालय पाउने सम्भावना रहेको नेताहरुको दाबी छ। 

हाल सरकारमा कांग्रेसको तर्फबाट गृहमन्त्री बालकृष्ण खाँण, कानुनमन्त्री ज्ञानेन्द्रबहादुर कार्की स्वास्थ्य राज्यमन्त्री उमेश श्रेष्ठ र माओवादीको तर्फबाट अर्थमन्त्री जनार्दन शर्मा र उर्जामन्त्रीमा पम्फा भुसाल मात्र सरकारमा सहभागी छन्। गत असार २९ गते प्रधानमन्त्री नियुक्त भएका देउवाले अझै पनि मन्त्रिपरिषद विस्तार गर्न सकेका छैनन्।