एमाले स्थायी कमिटी बैठक बस्दै, एकताको प्रयास वार्तामा मात्रै !

काठमाडौं । नेपाल कम्युनिष्ट पार्टी (नेकपा) एमालेको स्थायी कमिटी बैठक आज दिउँसो ३ बजे बस्दैछ । 

आजको बैठकमा पार्टी एकता प्रयास, पछिल्लो राजनीतिक घटना र समसामयिक विषयमा छलफल हुने नेताहरुले बताएका छन् । 

यसअघि शनिबार बस्ने भनिएको स्थायी कमिटी बैठक विघटित कार्यदलका सदस्यहरूको आग्रहमा स्थगित भएको थियो । कार्यदलका सदस्यहरुले १० बुँदे सहमतिको कार्यान्वयनका लागि थप छलफलपछि बैठक राख्न आग्रह गरेपछि बैठक स्थगित गरिएको थियो ।

शनिबारको बैठकमा सहभागी हुन अध्यक्ष केपी शर्मा ओलीसहित स्थायी कमिटी सदस्यहरु च्यासल पुगेका थिए । बैठकमा भाग लिन उपाध्यक्ष वामदेव गौतम पनि गएका थिए । त्यस्तै आफूहरुलाई माओवादीमै रहेको दाबी गर्ने नेताहरु पनि बैठकमा भाग लिन पुगेका थिए ।

पछिल्लो समय पार्टीभित्र चर्किएको आन्तरिक द्वन्दका कारण अध्यक्ष ओली र नेता माधवकुमार नेपाल भने एक अर्कामाथि गाली गलौजमा उत्रिरहेका छन्। यस्तो बेला दोस्रो तहका नेता जसरी पनि पार्टीलाई एक गराउनुपर्ने पक्षमा देखिएका छन्।