योगेश भट्टराईले लेखे भावुक स्टाटस, जीवनकै सबैभन्दा कठिन दिन

काठमाडौं । प्रधानमन्त्री केपी शर्मा ओलीको सिफारिसमा राष्ट्रपति विद्या भण्डारीले संविधानको धारा ७६(५) अनुसार सरकार गठनका लागि २१ घन्टाको समयसीमा दिएर आह्वान गरिसकेपछि राजनीतिक घटनाक्रम तीव्रतर विकास भइरहेका छन् ।  

प्रधानमन्त्री ओलीले आज दिउँसो पत्रकार सम्मेलनमा अल्पमतमा परेकाले धारा ७६(५) अनुुसार सरकार गठनका लागि मार्गप्रशस्त गरेको बताए । राष्ट्रपतिको आह्वान अनुसार नेपाली कांग्रेसका सभापति शेरबहादुर देउवाले शुक्रबार अपराह्न १४९ सांसदको हस्ताक्षर सहित सरकार गठनका लागि दाबी गरे । जसमा माओवादी केन्द्र, जसपाको उपेन्द्र यादव पक्ष र एमालेको माधव नेपाल समूहका २७ सांसदको पनि हस्ताक्षर थियो । त्यसमा माधव नेपाल पक्षका योगेश भट्टराईको हस्ताक्षर थिएन ।

माधव नेपाल पक्षमा सुरुदेखि नै सक्रिय भट्टराई पार्टी एकताका पक्षमा अहोरात्र लागेका थिए । विगतमा मालेमा लागेका कारण पछि परेको महसुस गरेका भट्टराईले देउवालाई प्रधानमन्त्री बनाउने सांसदहरुको सूचीमा हस्ताक्षर गरेका छैनन् । सांगठनिक क्षमता भएका एमालेका युवानेता भट्टराईले ओलीका बिरुद्ध देउवालाई प्रधानमन्त्री बनाउने पक्षमा हस्ताक्षर नगरेको बिषयमा चर्चा परिचर्चा भइरहेको छ । सामाजिक संजालमा भटट्राईले लेखेका छन्–आफूले सही गरें वा गलत गरें इतिहासको कठोर मूल्यांकनमा खडा छु ।’ उनको भावुक स्टाटसमा उल्लेख छ–‘आज मेरो राजनीतिक जीवनकै सबैभन्दा कठिन दिन आज । नेकपा एमालेको एकतालाई जोगाउन सकिन्छ कि भन्ने आशाले मैले आजको निर्णय लिएको हुँ । सही गरेंकी, गलत गरें इतिहासको कठोर मूल््याङ्कनमा खडा छु ।’

योगेश भट्टराई प्रधानमन्त्री ओलीको पक्षमा लागे पनि उनका अनुयायी रामकुमारी झाक्रीले हाँसीहाँसी ओलीलाई हटाउने र देउवालाई प्रधानमन्त्री बनाउनका लागि राजीनामा दिएकी छन् ।