सरकारले नागरिकको विश्वास गुमाउँदै गएको छ: प्रदीप पौडेल

काठमाडौँ। सरकारले नागरिकको विश्वास गुमाउँदै गएको नेपाली कांग्रेसका महामन्त्री प्रदीप पौडेलले औंल्याएका छन्।

आइतबार कांग्रेस स्याङ्जा क्षेत्र नम्बर २ (क) को प्रदेश कार्यसमितिको पद हस्तान्तरण तथा प्रशिक्षण कार्यक्रमलाई सम्बोधन गर्दै पौडेलले सरकारले नागरिकको चाहनाअनुसार काम गर्न नसकेको बताए।

उनले संविधान संशोधन, भोटेकोसी बाढी प्रभावितको समस्या तथा सुकुम्बासी समस्या समाधानमा सरकारको अपरिपक्वता देखिएको उनको भनाइ थियो। ‘सरकार नागरिकको विश्वास गुमाउँदै गएको छ,’ पौडेलले भने।

नागरिकको विश्वास जित्नुको सट्टा सरकारले लोकतान्त्रिक मूल्य र मान्तयता भत्काउँदै गएको आरोप लगाए। उनले निर्वाचन जित्दैमा कानुन मिच्ने लाइसेन्स प्राप्त नहुने बताउँदै लोकतान्त्रिक मूल्य, मान्यता र विधिको शासनको सम्मान गर्न सरकारलाई आग्रह गरे।

महामन्त्री पौडेलले कानुनी प्रक्रिया देखाएर तर्साउने काम नगर्न पनि सरकारलाई सचेत गराए। कांग्रेस रहेसम्म लोकतन्त्र र प्रेस स्वतन्त्रता कसैले खोस्न नसक्ने उनको भनाइ थियो।