काँग्रेसको १५औँ महाधिवेशनको लोगो र नारा सार्वजनिक

काठमाडौँ । नेपाली काँग्रेसले आगामी १५औँ महाधिवेशनका लागि लोगो र नारा सार्वजनिक गरेको छ।

काँग्रेसले बिहीबार सामाजिक सञ्जालमार्फत महाधिवेशनको लोगो सार्वजनिक गर्दै त्यसको नारासमेत सार्वजनिक गरेको हो।

महाधिवेशनका लागि काँग्रेसले ‘परम्पराको सम्मान, परिवर्तनको संकल्प, समुन्नत नेपालका लागि सबल काँग्रेस अबको विकल्प’ भन्ने नारा तय गरेको छ।

काँग्रेसले १५औँ केन्द्रीय महाधिवेशन आगामी असोज १६ देखि १९ गतेसम्म गर्ने कार्यतालिका यसअघि नै तय गरिसकेको छ। महाधिवेशनको तयारीअन्तर्गत असोज १० गते प्रदेशसभा र प्रतिनिधि सभा क्षेत्रीय अधिवेशन गर्ने कार्यक्रम रहेको छ।

महाधिवेशनमार्फत पार्टीको आगामी नेतृत्व तथा नीतिगत दिशाबारे निर्णय हुने भएकाले काँग्रेसको आन्तरिक राजनीतिक गतिविधि तीव्र हुने देखिएको छ।