देउवाको भनाइले ८१ प्रतिशत हिन्दू परिवारमा नयाँ आशा जगाएको छ : खुस्बु ओली

काठमाडौं । नेपाली कांग्रेसका पूर्वसभापति शेरबहादुर देउवाको हिन्दू हुँ भन्ने अभिब्यक्तिको राष्ट्रिय प्रजातन्त्र पार्टी(राप्रपा) की नेतृ खुस्बु ओलीले स्वागत गरेकी छन् ।

देउवाको अभिव्यक्तिले नेपालका ८१ प्रतिशत हिन्दू तथा समग्र सनातनी परिवारमा नयाँ आशा र विश्वास जगाएको ओलीले बताएकी छन् । नेपालको मौलिक सभ्यता, संस्कृति, परम्परा र सनातन पहिचानलाई सम्मान गर्ने आवाज जहाँबाट आए पनि त्यसको स्वागत हुनुपर्ने ओलीको मत छ ।

सांसद ओलीले सामाजिक संजालमा लेखेकी छन्–‘नेपाली कांग्रेसका शीर्ष नेता एवं पूर्वप्रधानमन्त्री श्री शेरबहादुर देउवाज्यूले आफू हिन्दू धर्मावलम्बी भएको र सनातन धर्मलाई राष्ट्रिय पहिचानका रूपमा स्वीकार गर्ने अधिवेशनको निर्णय र उहाँको व्यक्तिगत अभिव्यक्तिले गम्भीर राजनीतिक अर्थ बोकेको छ । उहाँको उक्त अभिव्यक्तिले नेपालका ८१ प्रतिशत हिन्दू तथा समग्र सनातनी परिवारमा नयाँ आशा र विश्वास जगाएको छ । नेपालको मौलिक सभ्यता, संस्कृति, परम्परा र सनातन पहिचानलाई सम्मान गर्ने आवाज जहाँबाट आए पनि त्यसको स्वागत हुनुपर्छ ।

नेपाललाई कुनै स्पष्ट जनभावना र राष्ट्रिय बहसविना धर्मनिरपेक्ष बनाइएको विषयमा आज पनि गम्भीर प्रश्नहरू उठिरहेका छन् । अब समय आएको छ ः देशको पहिचान, जनभावना र ऐतिहासिक निरन्तरतामाथि खुलेर राष्ट्रिय बहस गर्ने ।

देउवाज्यूको उक्त अभिव्यक्ति व्यक्तिगत आस्थाको मात्र अभिव्यक्ति नबनोस् । यसले नेपालको मौलिक पहिचान र सनातन सभ्यताको सम्मानतर्फ राष्ट्रिय राजनीतिको ‘कोर्ष करेक्सन’ को बाटो खोलोस् । किनभने, आस्था व्यक्तिगत हुनसक्छ, तर राष्ट्रिय पहिचान साझा हुनुपर्छ । नेपालको सनातन पहिचानमाथि अब इमानदार राष्ट्रिय बहस हुनैपर्छ ।’