प्रधानमन्त्री संसदमा नदेखिनु सुरक्षा खतरा कि नैतिक खतरा ?

काठमाडौं । प्रमुख प्रतिपक्षी नेपाली कांग्रेसले प्रधानमन्त्री केपी शर्मा ओली प्रतिनिधि सभाका यतिका बैठक हुँदा पनि संसदमा नआउनुको कारण सुरक्षा खतरा कि नैतिक खतरा भनि प्रश्न गरेकाे छ ।

केही समयअगाडि प्रधानमन्त्री ओलीले आफूमाथि गम्भीर सुरक्षा खतरा रहेको र कुनै पनि बेला भौतिक आक्रमण हुन सक्ने अभिव्यक्ति दिएको भन्दै कांग्रेस सांसद दिलेन्द्रप्रसाद बडुले यसबारे गृहमन्त्री वा सरकारका प्रवक्ताले संसदमा जानकारी गराउनुपर्ने माग गर्दै यसाे भनेका हुन् ।

ओलीले केही समयअगाडि आफूमाथि गम्भीर सुरक्षा खतरा रहेको र कुनै पनि बखत आफूमाथि भौतिक आक्रमण हुन सक्ने आसयको सार्वजनिक अभिव्यक्ति दिनुभएको थियो। यसमा सत्यता कति छ? यथार्थ के हो? उहाँको सुरक्षामा गृह मन्त्रालयले अहिले के के थप व्यवस्था गरेको छ?’ भन्ने प्रश्न गर्दै बडुले यसबारे यथाशीघ्र प्रधानमन्त्री वा गृहमन्त्री तथा सरकारका प्रवक्ताले संसदमा स्पष्टीकरण दिनुपर्ने माग गरेका छन् ।

सुरक्षा खतरा छैन भने नेपालको सुरक्षा व्यवस्था र क्षमतामाथि प्रश्न उठ्ने गरी बनावटी अभिव्यक्ति किन प्रधानमन्त्रीले दिएको भन्ने उनको प्रश्न छ।