प्रधानमन्त्री र राप्रपा नेताबीच के के विषयमा भयो छलफल ?

काठमाडौँ । प्रधानमन्त्री वालेन्द्र शाहले राष्ट्रिय प्रजातन्त्र पार्टी (राप्रपा) का शीर्ष नेताहरूसँग समसामयिक राजनीतिक विषय र संविधान संशोधनका विषयमा छलफल गरेका छन्।

सिंहदरबारस्थित प्रधानमन्त्री तथा मन्त्रिपरिषद्को कार्यालयमा भएको भेटमा राप्रपा अध्यक्ष राजेन्द्र लिङ्देन, वरिष्ठ उपाध्यक्ष बुद्धिमान तामाङ तथा केन्द्रीय सदस्य एवं सांसद खुश्बु ओली सहभागी थिए।

करिब एक घण्टा चलेको छलफलमा पछिल्लो राजनीतिक अवस्था, संविधान संशोधनको आवश्यकता तथा त्यससँग सम्बन्धित विषयमा विचारविमर्श भएको सांसद ओलीले जानकारी दिइन्।

उनका अनुसार प्रधानमन्त्री शाहले सरकारले अघि सारेका कामहरू प्रारम्भिक चरणमा रहेको र ती विषय क्रमशः निष्कर्षमा पुग्ने विश्वास व्यक्त गरेका थिए।

संविधान संशोधनका सन्दर्भमा सबै पक्ष र नागरिकका गुनासोलाई सम्बोधन गर्ने गरी प्रक्रिया अघि बढाइने धारणा प्रधानमन्त्रीले राखेको ओलीले बताइन्।

भेटका क्रममा राप्रपाको संविधान संशोधनसम्बन्धी पूर्ववत् धारणा पनि प्रधानमन्त्रीसमक्ष प्रस्तुत गरिएको उनले जानकारी दिइन्। साथै, राजनीतिक दलहरू र सांसदहरूबीच निरन्तर संवाद र समन्वय कायम राख्न आफूहरूले प्रधानमन्त्रीलाई सुझाव दिएको ओलीले बताइन्।