भरतपुर अस्पतालको २० बिघा जग्गामा मेडिकल कलेज र एनजीओको कब्जा, भाइरल सीडीओदेखि लामिछाने चुपचाप

काठमाडौं । सेवा बिस्तारसँगै  ६ सय शैयाको भरतपुर अस्पताललाई जग्गा अपर्याप्त छ । तर अस्पतालसँग ३१ बिघा जग्गा भए पनि त्यो जग्गा उसले प्रयोग गर्न सकेको छैन ।

भी नटराज र नगेन्द्र पम्पाटीसहितको भारतीयहरुको लगानीमा संचालित कलेज अफ मेडिकल साइन्सेजले ९ बिघा जग्गा ३२ बर्षदेखि कौडीको मूल्यमा प्रयोग गरिरहेको छ । त्यसका अतिरिक्त नेत्रज्योति संघ नामक गैरसरकारी संस्थाले ७ बिघा जग्गा अतिक्रमण गरेको छ । अझ उक्त जग्गा आफ्नै नाममा संघले दर्ता गर्न खोजेको थियो । यसका अतिरिक्त सीटीईभीटीले ७ बिघा र साझा स्वास्थ्य सेवाले डेढ कट्ठा जग्गाा अतिक्रमण गरेका छन् ।

भरतपुर अस्पताललाई जग्गा अपुग भएर विस्तार गर्न खोज्दा पनि आफ्नै जग्गा पाउन उसले सरकारसँग हारगुहार गर्दैआएको छ । स्वास्थ्य तथा खाद्य स्वच्छता मन्त्रालयदेखि सरकारका बिभिन्न निकायमा भरतपुर अस्पतालले जग्गा खाली गराइदिन अनुरोध गरेर दर्जनौैं पत्र लेख्दा पनि कुनै पनि सरकारले गराउन सकेनन् ।

यो पनि पढ्नुहोस् :

भरतपुर अस्पतालको १९ बिघा जग्गा अतिक्रमण, खाली गराउन वालेन सरकार किन भएन गम्भीर ?

वालेन्द्र शाह नेतृत्वको रास्वपाको सरकार आएपछि भरतपुर अस्पतालले जग्गा पाउन सक्ने अपेक्षा चितवनबासीले गरेका थिए । तर स्वास्थ्य मन्त्री मेहता चुनावअघि कलेज अफ मेडिकल साइन्समै कार्यरत रहेको र त्यही कलेजमा कार्यरत डा. मनोहर प्रधानलाई उनले सल्लाहकार बनाएपछि भरतपुर अस्पतालको जग्गा खाली गराउने कार्य हुने आशंका बढ्दै गएको छ ।

कोशी अस्पतालको जग्गामा बनेका संरचना प्रहरी लगाएर भत्काएको बालेन सरकारले भरतपुर अस्पतालसँग गैरकानुनी रुपमा ४९ बर्षका लागि लिजमा लिएर मेडिकल कलेजले बनाएका संरचना हटाउन किन बिलम्ब गरिरहेको छ ? भन्ने प्रश्न उठेको छ ।

चितवनका प्रमुख जिल्ला अधिकारी गणेश अर्याल सडकमा बिभिन्न स्टन्ट गर्दै हिंडिरहेका भिडियो भाइरल छन् । तर भरतपुर अस्पतालको जग्गा खाली गराउन उनले कुनै चासो राखेको देखिंदैन । कलेज अफ मेडिकल साइन्सका लगानीकर्ता नटराज र पम्पाटीबाट उनी पनि प्रभावित भएकाले संघीय सरकार अन्तर्गतको भरतपुर अस्पतालको जग्गा खाली गराउने प्रक्रियाका बारेमा अनभिज्ञ जस्तै बनेका त होइनन् भन्ने आशंका उत्पन्न भएको छ । रास्वपा सभापति रवि लामिछानेले पनि भरतपुर अस्पतालको जग्गाका बारेमा मौन देखिएका छन् ।