अख्तियारलाई ५ घन्टा हैन, आवश्यक परे पाँचै वर्ष राखेर सोधपुछ गर्छौं: प्रधानमन्त्री शाह

काठमाडौँ। प्रधानमन्त्री बालेन्द्र शाहले अख्तियार दुरूपयोग अनुसन्धान आयोगका पदाधिकारीहरूलाई आवश्यक परेमा पाँचै वर्ष पनि सोधपुछ र सरसल्लाह लिने बताएका छन्।

आइतबार प्रधानमन्त्री शाहले रास्वपाको प्रथम महाधिवेशनमा बोल्दै पछिल्लो समय अख्तियारलाई सोधपुछ गरिएको विषयमा ५ वर्ष नै राखेर सोधपुछ र सरसल्लाह लिने बताएका हुन्।

‘…त्यो निहुँ खोज्दै गर्दा अख्तियारलाई ५ घण्टा सोधपुछ गर्न पर्छ, सरसल्लाह लिन पर्छ भने ५ घण्टा मात्रै होइन, हामी ५ वर्ष गर्छौं.. ५ वर्षै अख्तियारलाई राखेर सरसल्लाह गरिन्छ। त्यसमा चिन्ता लिइराख्न पर्दैन,’ उनले भने।

उनले सरकारको सम्पत्ति दोहन भएको घटनाहरूमा निहुँ खोजिने बताए।

‘हाम्रो पार्टीले निहुँ खोज्नै परे कस्तो केशमा भने विगतमा फटाइँ भएको छ भने। सरकार सम्पत्तिको दोहन, सरकारी रकमको दोहन भएको छ भने त्यहाँ निहुँ खोज्छौं,’ उनले भने।

यस कामका लागि सामाजिक सञ्जालमा सरकार अनियन्त्रित देखिएको भए पनि नियम कानुन नमिचिने उनले बताए।