६० हजार घुससहित नापी कार्यालय चावहिलका अमिन पक्राउ

काठमाडौं । नापी कार्यालय चावहिल २ नं नापी टोलीका अमिन टोपजङ्ग खत्रीलाई अख्तियार दुरुपयोग अनुसन्धान आयोगको टोलीले ६० हजार घुससहित गोकर्णेश्वर नगरपालिका माकलबारीबाट पक्राउ गरेको छ ।

जग्गा हालसाविक गरी जग्गाधनी पूर्जा बनाइदिन सहजीकरण गरिदिने भनी सेवाग्राहीसँग घुस माग गरेका सूचना एवं उजुरी निवेदनका आधारमा आयोगको टङ्गालबाट खटिई गएको टोलीले अमिन खत्रीलाई मंगलबार साँझ नियन्त्रणमा लिएको जनाइएको छ ।

सेवाग्राहीबाट रू ६० हजार रुपैयाँ घुस लिइसकेको अवस्थामा उक्त रकमसहित गोकर्णेश्वर नगरपालिका वडा नं ४ कै कार्यालय परिसरबाट पक्राउ गरिएको अख्तियारको विज्ञप्तिमा उल्लेख छ । उनका बारेमा थप अनुसन्धान भइरहेको आयोगले जनाएको छ ।