सीमा सम्बन्धी प्रधानमन्त्रीको भनाइबारे गोप्य मतदान गर्न काँग्रेस सांसद यादवको प्रस्ताव

काठमाडौँ । सीमा विवादसँग जोडिएको प्रधानमन्त्री वालेन्द्र शाह (बालेन) को अभिव्यक्तिबारे संसदमा गोप्य मतदानमार्फत निर्णय गर्नुपर्ने प्रस्ताव नेपाली काँग्रेसकी सांसद रेखा कुमारी यादवले राखेकी छन्।

मंगलबार प्रतिनिधि सभाको बैठक सुरु भएपछि विपक्षी दलका सांसदहरूले उठेर आफ्नो धारणा राखेका थिए। सभामुखबाट समय पाएपछि सांसद यादवले पार्टीको तर्फबाट बोल्दै प्रधानमन्त्रीको अभिव्यक्तिमाथि गम्भीर समीक्षा आवश्यक रहेको बताइन्।

गत जेठ १७ गते प्रतिनिधि सभा बैठकमा सांसदहरूको प्रश्नको जवाफ दिने क्रममा प्रधानमन्त्रीले सीमा सम्बन्धी विषयमा दिएको अभिव्यक्तिलाई लिएर पछिल्लो समय संसदमा बहस भइरहेको छ।

सांसद यादवले प्रधानमन्त्रीको भनाइपछि देशमा भइरहेका गतिविधिप्रति ध्यान दिनुपर्ने बताइन्। उनले सुस्ता क्षेत्रमा भारतीय सीमा सुरक्षा बलको उपस्थितिको विषय तथा दार्चुलाको नेपाली आकाशमा भारतीय हेलिकप्टर उडेको भनिएको घटनाबारे पनि संसद्मा प्रश्न उठाइन्।

यस्ता घटनाबारे जवाफदेही निकाय को हो भन्ने प्रश्न गर्दै उनले प्रधानमन्त्रीको अभिव्यक्तिमाथि संसद्ले गोप्य मतदानमार्फत धारणा तय गर्नुपर्ने प्रस्ताव राखेकी हुन्।

उनले विषयलाई केवल सार्वजनिक बहस वा सञ्चार माध्यमको चर्चामा सीमित नगरी राज्यको गम्भीर सरोकारका रूपमा लिनुपर्ने धारणा व्यक्त गरिन्।