मुख्यमन्त्री शाहलाई दलको नेताबाट हटाउन अविश्वास प्रस्ताव दर्ता

काठमाडौं । सुदूरपश्चिम प्रदेशका मुख्यमन्त्री तथा नेपाली कांग्रेस संसदीय दलका नेता कमलबहादुर शाहविरुद्ध उनकै दलका बहुमत सांसदहरूले अविश्वास प्रस्ताव दर्ता गरेका छन् । यससँगै प्रदेश कांग्रेसभित्र लामो समयदेखि चलिरहेको आन्तरिक असन्तुष्टि औपचारिक रूपमा सतहमा आएको छ ।

प्रदेश सभामा कांग्रेसका १८ सांसद रहेकामा एक सांसद प्रकाश देउवा लामो समयदेखि अमेरिकामा बस्दै आएका छन् । नेपालमा रहेका १७ सांसदमध्ये ९ जनाले हस्ताक्षर गरी मंगलबार संसदीय दलमा शाहविरुद्ध अविश्वास प्रस्ताव दर्ता गराएको कांग्रेस स्रोतले जनाएको छ ।

पछिल्लो समय मुख्यमन्त्री शाहको कार्यशैली र नेतृत्वप्रति दलभित्र असन्तुष्टि बढ्दै गएको थियो । केही सांसदहरूले सार्वजनिक रूपमा नै नेतृत्व परिवर्तनको माग गर्दै उनको राजीनामा मागेका थिए । बढ्दो दबाबबीच मुख्यमन्त्री शाहले आफूले बहुमत सांसदको समर्थन गुमाएको पुष्टि भए पद त्याग्न तयार रहेको बताएका थिए ।

त्यसपछि असन्तुष्ट पक्षले हस्ताक्षर संकलन अभियान अघि बढाएको थियो । आवश्यक समर्थन जुटाएपछि संसदीय दलमा औपचारिक रूपमा अविश्वास प्रस्ताव दर्ता गरिएको हो ।

अविश्वास प्रस्ताव दर्ता भएसँगै अब नेपाली कांग्रेस संसदीय दलको बैठक निर्णायक बन्ने देखिएको छ । बैठकले वर्तमान नेतृत्वलाई निरन्तरता दिने वा नयाँ नेता चयन गर्ने विषयमा निर्णय गर्नेछ ।