नेपालले भारतीय भूमि मिचेको अभिव्यक्तिले चौतर्फी आलोचनामा प्रधानमन्त्री बालेन

काठमाडौं । विपक्षी दलहरूको निरन्तर दबाब र मागपछि आइतबार संसद्मा उपस्थित भएका प्रधानमन्त्री बालेन शाहले सीमा विवादका विषयमा दिएको एउटा अभिव्यक्तिले चौतर्फी रुपमा आलोचनामा परेका छन्।

प्रतिनिधिसभा बैठकको प्रत्यक्ष प्रश्नोत्तरमा भाग लिँदै प्रधानमन्त्री शाहले नेपालले पनि भारतको भूमि मिचेको बताएपछि संसद्मा नयाँ बहस र विवाद सिर्जना भएको हो ।

सीमा सुरक्षा र छिमेकी मुलुकसँगको सम्बन्धबारे विपक्षी सांसदहरूले सोधेको प्रश्नको जवाफ दिँदै उनले भने, ‘म प्रधानमन्त्री भएपछि थाहा पाएँ, भारतले मात्र होइन नेपालले पनि भारतको जग्गा मिचेको रहेछ ।’ यद्यपी उनले नेपालले कहाँ कहाँ भारतको भूमि नेपालले मिचेको छ भन्ने चाहीँ खुलाएनन् ।

मुलुकको कार्यकारी प्रमुखको पदमा रहेका व्यक्तिले संसद्को रोष्टमबाटै बिना कुनै आधिकारिक तथ्य यस्तो गम्भीर अभिव्यक्ति दिएपछि प्रमुख प्रतिपक्षी दल नेपाली कांग्रेसलगायतका दलहरूले तत्कालै यसको कडा प्रतिवाद गरेका छन् ।

नेपाली कांग्रेसकी प्रमुख सचेतक वासना थापाले प्रधानमन्त्रीको उक्त अभिव्यक्तिप्रति नियमापत्ति जनाउँदै सरकारसँग तत्काल स्पष्टीकरण माग गरेकी छन् । दुई देशबीचको संवेदनशील सीमा मामिलामा देशको प्रधानमन्त्रीले के आधारमा यस्तो बोलेको भन्दै उनले तथ्य सार्वजनिक गर्न चुनौती दिइन् ।

त्यस्तै एमालेका सांसद गुरुप्रसाद बरालले प्रधानमन्त्रीको उक्त अभिव्यक्तिले आम नेपालीको शीर झुकाएको उल्लेख गर्दै त्यसलाई गम्भिरतापूर्वक लिने बताएका छन् । उनले प्रधानमन्त्रीको सो अभिव्यक्तिले सबै नेपालीको प्रतिष्ठामा आँच आएको जिकिर पनि गरे ।

त्यसैगरी संवैधानिक कानुनविद् डा। भिमार्जुन आचार्यले पनि प्रतिनिधिसभा बैठकमा प्रधानमन्त्रीले दिएको अभिव्यक्ति अति नै असामान्य र गम्भीर भएको टिप्पणी गरेका छन् ।

त्यसैगरी नेपाली कम्युनिस्ट पार्टी ९नेकपा० का नेता भीम रावलले नेपालको भौगोलिक अखण्डताको रक्षा गर्ने कुरामा जोड दिनुको साटो नेपालले भारतको भूभाग मिचेको छ भन्ने झुटा कुरा संसद्‍मा गर्ने व्यक्तिलाई प्रधानमन्त्री पदमा एकछिन पनि बसिरहने नैतिक अधिकार नभएको बताएका छन्।