नेपालले पनि भारतको जमिन धेरै ठाउँमा मिचेको रहेछ: प्रधानमन्त्री

काठमाडौं । प्रधानमन्त्री बालेन शाहले नेपालले पनि भारतको जमिन धेरै ठाउँमा मिचेको आफुले थाहा पाएको बताएका छन् ।

आज प्रतिनिधसभा बैठकमा सांसदहरुले लिपुलेक, लिम्पियाधुरा सीमा मिचिएकोबारे उठाएको प्रश्नको जवाफ दिँदै उनले आफु प्रधानमन्त्री बनेपछि मात्रै नेपालले पनि भारतको जमिन मिचेको थाहा पाएको बताएका हुन्।

प्रधानमन्त्री भएपछि सीमासम्बन्धी विषयमा नयाँ तथ्यहरू फेला परेको उल्लेख गर्दै उनले दुवै पक्षबाट सीमा अतिक्रमण भएको पाइएको जानकारी दिए । उनले भने, ‘भारतले नेपालको जग्गा मात्र नभई, नेपालले पनि भारतको जग्गा धेरै ठाउँमा मिचेको तथ्य प्रधानमन्त्री भएपछि जानकारीमा आएको छ ।’

प्रधानमन्त्री बालेनले सीमाको यथार्थ अवस्था पत्ता लगाउन दुवै देशले संयुक्त अध्ययन गर्नुपर्नेमा जोड दिए । सीमा क्षेत्रमा देखिएका समस्यालाई एक मित्र राष्ट्रको हैसियतमा बसेर छलफलमार्फत टुङ्ग्याउने सरकारको लक्ष्य रहेको उनले बताए । कुन पक्षबाट कति जग्गा मिचिएको छ भन्ने विषयमा विस्तृत अध्ययन गरी मैत्रीपूर्ण ढङ्गले समस्या समाधान गर्न आफूहरू प्रतिवद्ध रहेको उनले स्पष्ट पारे ।

यद्यपी, उनले कहाँ कहाँ नेपालले सिमा मिचेको छ भन्ने चाहिँ खुलाएनन् । नेपालका कुनै पनि प्रधानमन्त्रीले आफ्नो देशले छिमेकी देशको सिमा मिचेको अभिव्यक्ति दिएको यो सम्भवत पहिलोपटक हो ।