पद छाडेर मार्ग प्रशस्त गर्न गृहमन्त्रीलाई हर्क साम्पाङको सुझाव

काठमाडौँ । श्रम संस्कृति पार्टीका अध्यक्ष हर्क साम्पाङले गृहमन्त्री सुधन गुरुङलाई राजीनामा दिएर पदबाट अलग हुन सुझाव दिएका छन्।

काठमाडौँमा आयोजित पत्रकार सम्मेलनमा बोल्दै उनले हालको परिस्थितिलाई दृष्टिगत गर्दै जिम्मेवारीबाट बाहिरिएर मार्ग प्रशस्त गर्नु उपयुक्त हुने धारणा व्यक्त गरेका हुन्।

सम्पत्ति शुद्धीकरणसम्बन्धी अनुसन्धानमा पक्राउ परेका व्यवसायी दीपक भट्टसँग साझेदारी रहेको विषय सार्वजनिक भएपछि गृहमन्त्री विवादमा परेका छन्।

सोही प्रसंगमा टिप्पणी गर्दै साम्पाङले मन्त्रीप्रति विभिन्न प्रकारका चर्चा-परिचर्चा बारम्बार सुनिनु चिन्ताजनक भएको उल्लेख गरे। उनका अनुसार “हप्तामा पटक-पटक विभिन्न कुरा सुनिनु उचित नदेखिने” भन्दै उनले यस्तो अवस्थामा पद छोड्नु नै उपयुक्त हुने बताए।

यसका साथै उनले सरकारसँग दूरीमा रहेर पनि आवश्यक परेमा प्रश्न उठाउने तथा रचनात्मक आलोचना गर्ने भूमिकामा रहने इच्छा व्यक्त गरेका छन्।