ओली-लेखकको बन्दी प्रत्यक्षीकरण मुद्दामा सुनुवाइ सम्पन्न, आजै निर्णय सार्वजनिक गर्ने तयारी

काठमाडौँ । नेकपा एमालेका अध्यक्ष तथा पूर्वप्रधानमन्त्री केपी शर्मा ओली र पूर्वगृहमन्त्री रमेश लेखकसँग सम्बन्धित बन्दी प्रत्यक्षीकरण निवेदनमा न्यायालयमा बहस प्रक्रिया सम्पन्न भएको छ। इजलासले सुनुवाइ सकिएसँगै आजै संक्षिप्त आदेश सार्वजनिक गर्ने संकेत गरेको छ।

उक्त निवेदन ओलीतर्फ उनकी पत्नी राधिका शाक्य तथा लेखकतर्फ पत्नी यशोदा लेखकले दायर गरेका हुन्। आइतबारदेखि सुरु भएको सुनुवाइ ‘हेर्दाहेर्दै’मा राखिँदै सोमबार पुनः अघि बढाइएको थियो।

सोमबारको कार्यसूचीअनुसार गृह मन्त्रालयसहितका विपक्षी पक्षका तर्फबाट महान्यायाधिवक्ताको कार्यालयले बहस प्रस्तुत गरेको थियो। त्यसपछि निवेदक पक्षबाट जवाफी बहस सम्पन्न भएसँगै इजलास आदेश तयारीतर्फ अघि बढेको हो।

उक्त मुद्दा न्यायाधीश विनोद शर्मा र सुनिलकुमार पोखरेलको संयुक्त इजलासमा विचाराधीन रहेको थियो। यसअघि अदालतले सम्बन्धित पक्षहरूसँग लिखित जवाफ समेत माग गरेको थियो।