आजदेखि सबै मतदान केन्द्रमा कर्मचारी र सुरक्षाकर्मी खटिने

काठमाडौं । आगामी फागुन २१ गते हुने निर्वाचनका लागि मतदान केन्द्रमा खटिने कर्मचारी र सुरक्षाकर्मीहरू सोमबार अपराह्नसम्म देशभरका केन्द्रहरूमा पुगिसक्ने भएका छन् ।

निर्वाचन आयोगले सबै कर्मचारीलाई सोमबार अपराह्नभित्र मतदान केन्द्रमा पुग्न निर्देशन दिएको छ । दुर्गम तथा विकट क्षेत्रका मतदान केन्द्रहरूमा भने केही दिनअघिदेखि नै कर्मचारी र सुरक्षाकर्मीहरूको टोली पुगिसकेको छ ।

यातायात सुविधा भएका स्थानमा सोमबार अपराह्नसम्म पुगेर तयारी गर्नुपर्ने आयोगको निर्देशन छ । निर्वाचन आयोगका प्रवक्ता नारायणप्रसाद भट्टराईका अनुसार, सोमबार बेलुकासम्म सबै केन्द्रमा टोली पुगिसक्नुपर्छ । मतदान केन्द्र पुगेपछि अपराह्नसम्म चार किल्ला तोकी हाता निर्धारण गरेको सूचना टाँस्नुपर्छ, जसले मतदान क्षेत्र स्पष्ट देखियोस् ।

देशभरका निर्वाचन अधिकृत कार्यालयबाट सुरक्षाकर्मीको उपस्थितिमा मतदान अधिकृतहरूले निर्वाचन सामग्री बुझ्छन् । सामग्री सिलबन्दी गरी २४ घण्टा निगरानीमा राखिन्छ ।

आइतबारसम्म विकटका ३ सयभन्दा बढी केन्द्रमा कर्मचारी पुगिसकेका थिए, विशेष गरी सुदूरपश्चिम र कर्णालीलाई प्राथमिकता दिइएको थियो । सहरी तथा तराई क्षेत्रमा सोमबार अपराह्नसम्म पुग्ने छन् । मतदान अधिकृतले चार किल्ला सूचना टाँसेपछि सर्वपक्षीय बैठक डाक्नेछन्, निर्वाचन प्रचार रोकिएको सूचना जारी गर्नेछन् । मतदान केन्द्र तयार पार्ने, मुचुल्का बनाउने, मतदान सम्पन्न भएपछि मतपेटिका बुझाउने काम हुनेछ ।