रुकुमपूर्वमा कर्मचारी परिचालनमा असन्तुष्टि, मतदान अधिकृतले त्यागे जिम्मेवारी 

काठमाडौं । आगामी फागुन २१ गते हुने प्रतिनिधिसभा सदस्य निर्वाचनका लागि कर्मचारी परिचालनको विषयलाई लिएर रुकुम पूर्वमा तिक्तता बढेको छ ।

निर्वाचन आयोगले शिक्षकहरूलाई पाखा लगाएर स्वास्थ्यकर्मीहरूलाई चुनावी जिम्मेवारीमा प्राथमिकता दिएको भन्दै सरकारी कर्मचारीहरू नै असन्तुष्ट बनेका हुन् ।

यसैक्रममा पुथा उत्तरगंगा गाउँपालिकाका सहायक शिक्षा अधिकृत रामप्रसाद खड्काले आफूलाई तोकिएको मतदान अधिकृतको जिम्मेवारी लिखित रूपमै त्याग गर्ने घोषणा गरेका छन् ।

खड्काले जिल्ला निर्वाचन कार्यालयलाई पत्र बुझाउँदै भूमे गाउँपालिका–९ स्थित नेपाल राष्ट्रिय माध्यमिक विद्यालय चुन्वाङको मतदान अधिकृत भएर काम गर्न आफ्नो नैतिकताले नदिने स्पष्ट पारेका छन् ।

राज्यले समाजलाई चेतना दिने शिक्षक वर्गको मान–मर्यादामा आँच पुग्ने गरी विभेदकारी नीति लिएको उनको आरोप छ । शिक्षकहरूलाई पूर्ण रूपमा बाइपास गरेर स्वास्थ्यकर्मीहरूलाई चुनावी मैदानमा उतार्ने जिल्ला निर्वाचन कार्यालयको निर्णयप्रति उनले कडा आपत्ति जनाएका छन् ।

यो विवाद केवल शिक्षकहरूको मान–मर्यादासँग मात्र जोडिएको छैन । स्वास्थ्य तथा जनसंख्या मन्त्रालयले यसअघि नै निर्वाचनको समयमा स्वास्थ्यकर्मीहरूलाई २४ सै घण्टा ‘अलर्ट’ रहनुपर्ने भन्दै उनीहरूलाई चुनावमा नखटाउन पत्राचार गरिसकेको छ ।

मन्त्रालयका निर्देशनका बाबजुद जिल्लामा उपलब्ध अन्य जनशक्तिलाई छाडेर स्वास्थ्यकर्मीलाई नै चुनावी जिम्मेवारी सुम्पिएपछि नेपाल शिक्षक महासंघ र नेपाल पत्रकार महासंघ रुकुम पूर्वले पनि विरोध जनाउँदै आएका छन् ।

निर्वाचनको संघारमा जिम्मेवार तहका कर्मचारीले नै कार्यक्षेत्रमा जान अस्वीकार गरेपछि जिल्ला निर्वाचन कार्यालय रुकुम पूर्व ठूलो दबाबमा परेको छ । एकातिर स्वास्थ्य मन्त्रालयको प्राविधिक निर्देशन र अर्कोतिर शिक्षा क्षेत्रका कर्मचारीहरूको संगठित असन्तुष्टिले चुनावी व्यवस्थापनलाई चुनौतीपूर्ण बनाएको छ ।

रिक्त रहेको मतदान अधिकृतको पदमा कसरी पदपूर्ति गर्ने र बढ्दो विवादलाई कसरी साम्य पार्ने भन्ने विषयमा निर्वाचन अधिकारीहरू अहिले अन्योलमा देखिएका छन् ।