धरहराको सञ्चालन तथा व्यवस्थापन काठमाडौँ महानगरपालिकाले गर्ने

काठमाडौँ। ऐतिहासिक धरहराको सञ्चालन र व्यवस्थापनको जिम्मेवारी काठमाडौँ महानगरपालिकाले लिने भएको छ।

शुक्रबार संघीय सरकार र महानगरपालिकाबीच भएको छलफलले धरहराको हस्तान्तरण तथा सञ्चालन र व्यवस्थापन प्रक्रियाको अध्ययन गर्न तत्काल अध्ययन समिति गठन गर्ने निर्णय गरेको छ। महानगरपालिकाकी कार्यवाहक प्रमुख सुनिता डंगोलले धरहराको सञ्चालन तथा व्यवस्थापनको जिम्मेवारी महानगरलाई दिनको लागि आवश्यक अध्ययन गर्न समिति गठन गर्ने निर्णय भएको जानकारी दिइन्।

उनले धरहराको पार्किङ र सञ्चालनको ठेक्का लिएको निजी कम्पनीलाई कुनैपनि असर नपर्नेगरी अध्ययन गरेर निष्कर्ष निकाल्ने र सोहीअनुसार अघि बढ्ने निर्णय भएको बताइन्। धरहराको बेसमेन्ट पार्किङको व्यवस्थापन समेत काठमाडौँ महानगरपालिकालाई दिने निर्णय छलफलले गरेको छ।

उनले भने, ‘धरहरालाई काठमाडौँ महानगरलाई हस्तान्तरण गर्नुपर्छ भन्ने माग हामीले गर्दै आइरहेका छौँ। पहिले पनि धरहराको व्यवस्थापन तथा सञ्चालन काठमाडौं महानगरपालिकाले नै गर्दै आइरहेको हो। अहिले स्थानीय सरकारको रुपमा धरहरा व्यवस्थापन र सञ्चालन काठमाडौं महानगरपालिकाले गर्छ र त्यसका लागि तत्पर छ। आजको बैठकमा पनि यो अनुरोध रह्यो। धरहरा महानगरलाई हस्तान्तरण गर्ने प्रक्रिया र त्यसको सञ्चालनको बारेमा अध्ययन गर्नको लागि समिति गठन गर्ने निर्णय पनि आजको बैठकले गरेको छ।’

महानगरपालिकाले न्युरोड क्षेत्रलाई नो पार्किङ जोन घोषणा गरी कार्यान्वयन गरिरहेको अवस्थामा धरहरामा निःशुल्क पार्किङको सुविधा गर्ने कार्यवाहक प्रमुख डंगोलको भनाइ छ।

उनले थपिन्, ‘न्यूरोड आफैंमा एउटा कमर्सियल एरिया हो। यहाँ धेरै व्यवसायहरू चलिरहेको छ। त्यहाँ अहिले पार्किङ सडकमा गर्न पाइँदैन भन्ने छ। त्यसको कार्यान्वयन पनि भइरहेको छ। हामीले नगर त भन्यौँ तर विकल्प दिन सकिरहेका छैनौँ। त्यसको महत्वपूर्ण विकल्प भनेको धरहराको अण्डरग्राउण्ड पार्किङ रहेको छ।’

उनले धरहराको व्यवस्थापन र हस्तान्तरण काठमाडौँ महानगरपालिकालाई दिइए महानगरको आन्तरिक राजश्व बढ्ने विश्वास पनि व्यक्त गरिन्।