रास्वपाले झण्डा जलाएको घटनामा एमालेले भन्यो- अपरिपक्वताको चरम उदाहरण

काठमाडौँ। दाङमा बिहीबार राति राष्ट्रिय स्वतन्त्र पार्टीका समर्थकहरूले एमालेको चुनाव चिह्न ‘सूर्य’ अंकित झण्डा जलाएको घटनापछि नेपाल कम्युनिष्ट पार्टी (एमाले)ले उक्त कार्यलाई अपरिपक्वताको चरम उदाहरण भएको आरोप लगाएको छ।

बिहीबार राति तुलसीपुर बजारमा रास्वपा कार्यकर्ताहरूले एमाले अध्यक्ष केपी शर्मा ओलीविरुद्ध नाराबाजी गर्दै पार्टीको प्रतीकात्मक झण्डा जलाएका थिए। यसलाई एमालेले ‘आस्था र भावनामाथिको प्रहार’का रूपमा व्याख्या गरेको छ।

एमाले दाङ जिल्ला अध्यक्ष शिवकुमार आचार्यले जारी गरेको विज्ञप्तिमा राष्ट्रिय स्वतन्त्र पार्टीलाई जिम्मेवार राजनीतिक शक्ति बन्न आग्रह गर्दै भनेका छन् कि उग्रता र उत्तेजनाको सहाराले मात्र सानो चर्चा पाउन सकिएला तर यो राजनीतिक अपरिपक्वताको स्पष्ट उदाहरण हो।

उनीहरूले थपे, “लोकतान्त्रिक प्रतिस्पर्धा मर्यादित व्यवहार, तथ्यमा आधारित आलोचना र वैचारिक स्पष्टताबाट सुदृढ हुन्छ, अराजक प्रदर्शनबाट होइन। प्रियतावादले तत्काल केही सहानुभूति त दिलाउन सक्छ, तर त्यसको दीर्घकालीन परिणाम गम्भीर एवं नकारात्मक हुनेछ।”

---