गस्तीमा जाँदा पेस्तोल हराउने सईलाई उन्मुक्ति दिँदै मधेश प्रदेश प्रहरी

जनकपुरधाम । आफैंले बोकेको पेस्तोल हराएको पत्तो नपाउने नेपाल प्रहरीका एक जुनियर अधिकृतलाई कारबाही नगरी जोगाउन मधेश प्रदेश प्रहरी कार्यालयका डीआईजी गोविन्द थपलिया नै लागेका छन् ।

जिल्ला प्रहरी कार्यालय बारा अन्तर्गत कवईगोठका इन्चार्ज प्रहरी नायब निरीक्षक (सई) संजीव मिश्रले चार दिनअघि सोमबार पेस्तोल हराएका थिए । ७ राउन्ड गोली लोड गर्न मिल्ने अमेरिकी पेस्तोल बोकेर ड्युटीमा गएका उनले हराएका थिए ।

कवईगोठ चौकी सीमाक्षेत्रमा पर्दछ । मिश्र सीमाक्षेत्रमा ड्युटीमा जाँदा आफैंले बोकेको पेस्तोल हराएका थिए । सोमबार हराएको पेस्तोल आज बिहीबारसम्म पनि भेटिएको छैन ।

सई मिश्रले पेस्तोल हराएपछि मधेश प्रदेश प्रहरी कार्यालयका एसपी भेषराज रिजालको संयोजकत्वमा छानबिन समिति बनाइएको छ । रिजालले उनलाई जोगाउन खोजेका छन् । डीआईजी थपलिया पनि उनलाई जोगाउनेतर्फ लागेको आरोप छ ।

पेस्तोल लिएर आएमा कारबाही नगर्ने हिसाबले सई मिश्रलाई उन्मुक्ति दिन लागिएको छ ।