‘रवि लामिछानेलाई धरौटीमा रिहा गर्ने अदालतको आदेश स्वागतयोग्य’: डा. बाबुराम भट्टराई

काठमाडौँ । प्रगतिशील लोकतान्त्रिक पार्टीका संयोजक डा. बाबुराम भट्टराईले रास्वपा सभापति रवि लामिछानेलाई अदालतद्वारा सशर्त धरौटीमा रिहा गर्न दिएको आदेश स्वागतयोग्य रहेको बताएका छन्।

रविलाई धरौटीमा रिहा गर्न दिएको आदेश मुद्दा अघि बढाउन गरिएको निर्णय विधिको शासन, सहकारी पीडितको हित र राजनीतिक उपयुक्तता सबै हिसाबले स्वागतयोग्य रहेको उनको भनाइ छ।

पूर्वप्रधानमन्त्री समेत रहेका भट्टराईले भनेका छन्, ‘यसले उहाँलाई विधिसम्मत तरिकाले आफ्नो निष्ठा प्रमाणित गर्ने, जनताबीच गएर जनअनुमोदन प्राप्त गर्ने र सहकारी पीडितहरूले पनि आफ्नो गहिरो पीडाको सम्बोधन कानुनी रूपबाटै प्राप्त गर्ने मार्ग प्रशस्त गरेको छ।’

रविबारे आफूले गत वर्षदेखि पटक-पटक उठाउँदै आएको कुरा अदालतबाट भएको बताए।

उनले थपेका छन्, ‘हेरौँ, मैले गत वर्ष पोखराको प्रहरी हिरासतमा रविजीलाई भेटेर निस्केपछि मिडियासमक्ष व्यक्त गरेको विचार, लोकतन्त्रको सौन्दर्य यही हो। सबैले आत्मसात् गरौँ। तथ्यबाट सत्य खोजौँ। कुनै उडन्ते अनुमानबाजी र षड्यन्त्रको सिद्धान्तको पछि नलागौँ।’

बहुदलीय लोकतन्त्र भनेको दलहरू र व्यक्तिहरूबीच स्वस्थ प्रतिस्पर्धा र आवश्यक सहकार्यको फ्युजन हो भन्ने भुल्न नहुने उनको भनाइ छ।

‘प्रतिस्पर्धा गर्दा दुस्मन जस्तो गर्ने र सहकार्य गर्दा आफ्ना फरक फरक वैचारिक राजनीतिक आस्था र प्रतिबद्धता बिर्सने गल्ती नगरौँ’ उनले भनेका छन्।