जेनजी–सरकार १० बुँदे सम्झौताको बिरोध, मिराज ढुंगानाद्वारा अस्वीकार

काठमाडौँ । सरकार र जेनजी समूहबीच बुधबार राति भएको १० बुँदे सम्झौताप्रति जेनजी अभियानका अभियन्ता मिराज ढुङ्गानाले असन्तुष्टि व्यक्त गरेका छन् ।

उनले सम्झौताले आन्दोलनका मूल मुद्दा, भावना र निर्णायक निष्कर्ष समेट्न नसकेको आरोप लगाउँदै यो जनआन्दोलनको आत्मालाई कमजोर बनाउने समझदारी भएको टिप्पणी गरेका हुन् ।

बुधबार जारी विज्ञप्तिमा ढुङ्गानाले सुधन गुरुङतर्फ लक्षित गर्दै राजनीतिक सहमतिले व्यापक जनआवाजलाई बेवास्ता गरेको र केही सीमित स्वार्थ समूहको दबाबमा सम्झौता गरिएको दाबी गरे । उनका अनुसार यस्तो अपारदर्शी प्रक्रिया भविष्यमा अझ गम्भीर राजनीतिक अविश्वास र अस्थिरताको कारण बन्न सक्छ ।

“जनताको बलिदान, भावना र परिवर्तनको चाहनालाई नजरअन्दाज गर्ने कुनै पनि सहमति स्वीकार्य हुँदैन,” विज्ञप्तिमा उल्लेख छ।

ढुङ्गानाले सम्झौता पुनर्विचार गरी जनआन्दोलनले उठाएका आधारभूत एजेण्डाहरूलाई स्पष्ट प्रतिनिधित्व गर्न सरकारलाई आग्रह गरेका छन् ।