सर्लाहीका नाकाबाट कपडा, हार्डवेयर र किराना तस्करी निरन्तर

सर्लाही । सर्लाहीका विभिन्न नाकाबाट दैनिक रूपमा हुने अवैध ओसारपसार रोकिएको छैन । त्रिभुवननगर, सखुवबा, फेनहरा, छन्किटोला, गडहिया–खैरवा, भाडसरदेखि धरमपुर पुलसम्म फैलिएको तस्करी सञ्जाल सक्रिय रहेको स्थानीयले बताएका छन् । सीमाबाट चाइनिज लाइटर, लसुन, कपडा, ब्याट्री, किराना सामग्री, मदिरा, स्याउ, चल्ला, हार्डवेयरका सामान, बालुवा–गिट्टी लगायत दर्जनौँ वस्तुहरू निर्वाध रूपमा भित्रिने र बाहिरिने क्रम बढ्दो छ ।

स्थानीय स्रोतका अनुसार भायलोग नामका तस्करदेखि सेराजुल मिकरानीसम्म सबैले सीमाक्षेत्रमा बलियो जालो बुनिसकेका छन् । पर्सा नाकाबाट मुसैलीका जितेन्द्र यादव र ब्रहम्पुरीका कृष्ण यादवले ब्याट्री र कबाडको संयुक्त कारोबार गर्दै आएका छन् भने फेनहरा नाकाबाट सुरेश चौधरीले पनि कबाडको लाइन सञ्चालन गर्दै आएका छन् । बलराका नविन चौधरी यस्तै कारोबारका पुराना खेलाडीका रूपमा परिचित छन् ।

कपडा तस्करीमा इनरवाका विजय दास तत्मा र पुकार ठाकुर सक्रिय रहेका छन् । पर्साका सरोज साह सोनारले पनि सोही नाकाबाट कपडा ओसार्ने गर्छन् । त्रिभुवननगरका हुसैनी कपडाको ठूलो लाइन चलाउने व्यक्तिमध्येका रूपमा चिनिन्छन् । गम्हरियाका विजय साह कलवार भाडसर नाकाबाट कपडा तान्छन् भने खैरवाका बुधु यादव छन्किटोला नाकाबाट रङ्गा तस्करी गर्छन् । सोही क्षेत्रमा रामइश्वरले बलरा–छन्कि मार्ग प्रयोग गरी कपडा र दैनिक उपभोग्य सामग्री ओसार्ने गरेको स्रोतले बताएको छ ।

मलङ्वाबाट काठमाडौं जाने बस र अन्य सार्वजनिक सवारीसाधन पनि तस्करीका मुख्य माध्यम बनेका छन् । यी सवारीमार्फत कपडा, काजु–किसमिस र स्पेयर पार्ट्स ओसारिने गरेको स्थानीयले दाबी गरेका छन् । संग्रामपुर नाकाकी सोभा मैडम स्कुटीमार्फत किराना सामान ओसार्ने नामले परिचित छिन् । त्रिभुवन नाकाका सुजित यादव लोकल बसमार्फत किराना पठाउने गर्छन् । ‘जितेन्द्र किराना’, ‘मलखाद’, ‘राजा हार्डवेयर’ र ‘तिन बहिनी’ समूहले पनि लोकल बसलाई मुख्य साधन बनाएर किराना सामग्री भित्र्याउने गरेको पाइएको छ । ‘मैडम’ नामले चिनिने अर्की महिलाले काजु–किसमिस ओसार्ने कार्य नियमित रूपमा गर्दै आएकी छन् ।

लालबन्दीका शेखर गुप्ता अटोमार्फत किराना र हार्डवेयर सामग्री पठाउने गर्छन् । बरहथवाका राजेश यादव सुपारी, कपडा, किराना तथा हार्डवेयर सामान तस्करीमा संलग्न छन्। मनोज, सिकिन्दर र सोपिन्दरले गडहिया–खैरवा–बाध हुँदै रौतहटको धरमपुर पुलमार्ग समातेर बहुमूल्य सामग्री ओसार्ने गरेको पाइएको छ । बयलबासकी बबिता अटोमार्फत कपडा तथा किराना सामग्री तस्करी गर्दै आएकी छन् । उनलाई रोक्न प्रहरी स्वयं हिचकिचाउने गरेको आरोप छ । फोनमार्फत धम्क्याउने, ब्ल्याकमेल गर्ने जस्ता घटनाले उनी प्रशासनको निगरानीभन्दा बाहिर रहेकी प्रमाणित गरेको स्थानीयले बताएका छन् ।

यसबीच सशस्त्र प्रहरीले चन्द्रपुर नगरपालिका–४ देउराली चोकबाट भायलोगलाई अत्याधुनिक हतियारसहित नियन्त्रणमा लिएको छ । पक्राउ परेका उनलाई थप अनुसन्धानका लागि आवश्यक प्रक्रिया अघि बढाइएको छ ।

जिल्ला प्रहरी कार्यालय सर्लाहीका सूचना अधिकारी डिएसपी सरोज राईले सीमाबाट हुने चुहावट रोक्न युनिटहरू सक्रिय रहेको दाबी गर्दै सम्भावित चुहावट न्यूनिकरणका लागि निरन्तर प्रयास जारी रहेको बताए । उनले भने, “सीमामा कसले, कहिले, के ल्याउँछ भन्ने पहिल्यै थाहा पाउन गाह्रो हुन्छ। तर नियन्त्रण र निगरानी दुवै पक्षलाई मजबुत पार्ने प्रयास जारी छ ।”