मधेशको प्रदेश प्रमुखमा सुरेन्द्र लाभको सिफारिस, होटलमा सपथ गराउने भण्डारी बर्खास्त

काठमाडौं । सोमबार बिहान मुख्यमन्त्री सरोज यादवलाई होटलमा सपथ गराउने प्रदेश प्रमुख सुमित्रादेवी भण्डारीलाई सरकारले बर्खास्त गरेको छ ।

सोमबार साँझ बसेको मन्त्रिपरिषद्को बैठकले मधेश प्रदेश प्रमुख भण्डारीलाई पदबाट हटाउने निर्णय गरेको हो । मन्त्रिपरिषदले मधेश प्रदेशको प्रमुखमा सुरेन्द्र लाभलाई नियुक्ति गर्न राष्ट्रपतिसमक्ष सिफारिस गरेको छ ।

सरकारको सिफारिसमा राष्ट्रपतिले प्रदेश प्रमुखको नियुक्ति गर्ने ब्यवस्था छ । दलहरुको बिरोध हुँदाहुँदै मधेश प्रदेशको सबैभन्दा ठूलो दलका संसदीय दलका नेता यादवलाई सपथ गराएपछि सोमबार बिहान जनकपुरमा बिरोध प्रदर्शन भएको थियो । सांसदहरुले प्रदेश प्रमुखदेखि मुख्यमन्त्री कार्यालयमा तोडफोड गर्नेदेखि राष्ट्रिय झन्डा फाल्नेसम्म गरेका थिए ।

यसअघि मधेश प्रदेशका मुख्यमन्त्री जितेन्द्र सोनलले विश्वासको मत प्राप्त गर्न नसकेपछि राजीनामा दिएका थिए । तत्कालीन माओवादी केन्द्रका सांसदद्वय रहबर अन्सारी र माला कर्णले विश्वासको मत नदिने घोषणा गरेपछि सोनलको सरकारले बहुमत पुरयाउन नसकेपछि राजीनामा दिएको थियो ।