नारायणकाजी र वामदेवसहित राष्ट्रियसभाका १९ सांसदको कार्यकाल सकिँदै

काठमाडौं । आगामी फागुनदेखि राष्ट्रियसभाका १९ जना सांसदहरूको कार्यकाल समाप्त हुँदैछ । जेनजी आन्दोलनपछि गठन भएको सरकारले राष्ट्रियसभाको रिक्त सदस्यको निर्वाचन गर्ने भएको छ ।

राष्ट्रियसभाको कार्यकाल समाप्त हुनेमध्ये एमालेका ८, माओवादी केन्द्रका ७, एकीकृत समाजवादी, जनता समाजवादी पार्टी (जसपा) र लोकतान्त्रिक समाजवादी पार्र्टी (लोसपा) का एक–एक सांसद तथा राष्ट्रपतिद्वारा मनोनीत एक सांसद रहेका छन् ।

संघीय संसदका प्रवक्ता एकराम गिरीका अनुसार, कार्यकाल सकिएर बिदा हुन लाग्ने सांसदहरूमा माओवादी केन्द्रबाट गोपीबहादुर सार्की अछामी, गङ्गाकुमारी बेलवासे, जगप्रसाद शर्मा, तारामान स्वाँर, नारायणकाजी श्रेष्ठ, मायाप्रसाद शर्मा र राधेश्याम पासवान छन् ।

त्यस्तै, एमालेका इन्दिरादेवी गौतम, गोपाल भट्टराई, तुलसाकुमारी दाहाल, देवेन्द्र दाहाल, भगवती न्यौपाने, विमला घिमिरे, शारदादेवी भट्ट र सुमित्रा बीसीको कार्यकाल पनि फागुनदेखि समाप्त हुँदैछ ।

एकीकृत समाजवादीका बेदुराम भुसाल, जसपाका मृगेन्द्रकुमारसिंह यादव, लोसपाका शेखरकुमार सिंह र राष्ट्रपतिबाट मनोनीत सांसद वामदेव गौतम पनि कार्यकाल सकिएर बिदा हुने सांसदहरूको सूचीमा परेका छन् ।

सरकारले राष्ट्रिय सभाको रिक्त हुन लागेका पद पूर्तिका लागि आगामी माघ ११ गते निर्वाचन मिति तय गरेको छ ।