वीरगञ्जमा सशस्त्र प्रहरी र बालुवा तस्करबीच झडप, ३ जना प्रहरी घाइते

वीरगञ्ज । वीरगञ्जमा सशस्त्र प्रहरी र बालुवा तस्करबीच झडप हुँदा ३ जना सुरक्षाकर्मी घाईते भएका छन् । ओरिया खोलाको बालुवा अवैध रुपमा उत्खनन गरीरहेको अवस्थामा सशस्त्र प्रहरी र भारतीय बालुवा तस्करबिच झडप हुँदा उनीहरू घाइते भएका छन् ।

पर्साको जगरनाथपुर गाउँपालिका वडा न. १ पिपडाढीमा ओरिया खोलाको बालुवा उत्खनन गरीरहेको भारतीय ट्याक्टरलाई प्रहरीले नियन्त्रणमा लिन खोज्दा भएको झडपमा ३ जना सशस्त्र प्रहरी घाइते भएका हुन् ।

सशस्त्र प्रहरी आउट पोष्ट पिडारीगुठी र महादेवपट्टीको सयुँक्त टोलीले अवैध रुपमा भइरहेको बालुवा उत्खननलाई रोक्न खोज्दा भारतको गदियानी भंगाहाका स्थानीयहरुले लाठी, भाठा, बेल्चा तथा ढुंगामुढा प्रहार गरेर सशस्त्र प्रहरीलाई आक्रमण गरेका थिए ।

झडपमा घाइते भएका सशस्त्र प्रहरीको स्थानीय स्वास्थ्य संस्थामा उपचार भइरहेको छ । सशस्त्र प्रहरीले नियन्त्रणमा लिइएको ट्याक्टर समेत भारतीयले लिएर गएको बताइएको छ ।