बालेन साहका पिताले नक्कली प्रमाणपत्रकै आधारमा जागिर खाएका थिए ?

काठमाडौं । काठमाडौं महानगरका नगरप्रमुख बालेन्द्र सा(बालेन)ले सिंहदरबारमा आगो लगाइदिन्छु, राजनीतिक दलका नेताहरुलाई टुकुचामा गाडिदिन्छु भन्दा पनि उनलाई कुनै कारबाही गरिएन ।

साहकै निर्देशनमा अन्ततः भदौ २४, २०८२ मा सिंहदरबारदेखि सर्वोच्च अदालत, विशेष अदालत, मन्त्रालयदेखि सम्पूर्ण सरकारी कार्यालयमा आगजनी र तोडफोड गरियो । त्यसको डिजाइनर उनै बालेन्द्र भएको आरोप छ । प्रदर्शनलाई उकास्न भदौ २२ गते र २३ गते साँझ उनले फेसबुकमा स्टाटस लेखेका थिए । प्रदर्शनकारीले बालेनलाई सडकमा नेतृत्व गर्नका लागि आह्वान समेत गरेका थिए । तर उनी सिंहदरबार जलाउनेहरुलाई रोक्न समेत गएनन् । ३ दिनसम्म सिंहदरबार र सर्वोच्च अदालत दनदनी बलिरहँदा निभाउन महानगरको दमकलसमेत पठाएनन् ।

ऐतिहासिक संरचनाहरुमा हालसम्मका आन्दोलन वा क्रान्तिका समयमा कुनै पनि आन्दोलनकारीले ऐतिहासिक सम्पदा जलाउने धृष्टता गरेका थिएनन् । किनकि त्यो आम नेपालीको ऐतिहासिक युगौंदेखिको सम्पत्ति थियो । अहिले जलेका भवन देखेर नेपाललाई माया गर्ने जो कोही पनि आँसु थाम्न सक्तैनन् । सर्वोच्च अदालत, स्वास्थ्य मन्त्रालय, गृह मन्त्रालय, प्रधानमन्त्री कार्यालय, राष्ट्रपति कार्यालयजस्ता महत्वपूर्ण कागजात भएका ठाउँमा खोज्दै आगो लगाइयो । तथापि बालेन्द्र साहकै निर्देशनमा आगो निभाउनसमेत काठमाडौं महानगरपालिकाको दमकल जान दिइएन ।

भनिन्छ, बालेन्द्र साह सुशीला कार्की नेतृत्वको अहिलेको सरकारका डिजाइनर हुन् । उनी डीप स्टेटको प्रतिनिधि भएको बुद्धिजीवीहरुले आरोप लगाएका छन् । उनकै योजनामा देशमा आगो लगाइएको अहिले बजारमा चर्चा छ । आगो लागेको खरानीमाथि सुशीला कार्कीले चुनावी सरकारको नेतृत्व गरेकी छन् । उनै बालेन्द्र साहका कानूनी सल्लाहकारलाई गृहमन्त्रालयको जिम्मेवारी दिइएको छ ।

बालेन्द्र साह (बालेन)का बाबु डा.रामनारायण साह नक्कली प्रमाणपत्र प्रयोग गरी जागिर खाएको आरोपमा निलम्बनमा परेका थिए । उनले भारतको पटनाबाट इन्टरमिडियट, पटना विश्वविद्यालयबाट बीएएमएस र गुजरात विश्वविद्यालयबाट आयुर्वेदमा एमडी भन्दै आयुर्वेद विभागमा जागिर खाएका हुन् ।

इन्टरमिडियट लेबलको प्रमाणपत्र उनले भारतको पट्नाबाट खरिद गरी ल्याएको भन्दै अख्तियार दुरुपयोग अनुसन्धान आयोगमा उजुरी परेपछि छानबिन भएको थियो । अख्तियारले उनले ल्याएको कलेजको इन्टरमिडियट लेबलको प्रमाणपत्रको रेकर्ड छ कि छैन भनि पत्रचार गर्दा रेकर्ड नभेटिएको भन्ने जवाफ आएका कारण मुद्दा दर्ता गरेको स्रोतले डायरी एक्सप्रेसलाई बतायो । रामनारायणका विरुद्धमा अख्तियारले २०६६ सालमा अभियोग दर्ता गरेको थियो ।

नक्कली प्रमाणपत्र प्रयोग गरेका रामनारायण सिंहदरबार बैद्यखाना विकास समितिका कार्यकारी निर्देशक भएर २०५८ साल मंसिर २९ गते देखि २०६३ साल वैशाख ३१ गतेसम्म काम गरेका थिए । यसरी साहले चार वर्षको कार्यकाल भए पनि चार वर्ष ५ महिना जागिर खाएका छन् ।

चारबर्षे कार्यकाल भएको सिंहदरबार वैद्यखाना विकास समितिको निर्देशक पदमा पनि उनी धाधली गरी पाँच महिना बढी बसेर अकूत कमाएका थिए । जसबाट उनलाई बढी नै फलिफाप हुन पुग्यो । त्यसपछि उनले सिनामंगलमा घर बनाएको एक जना स्वास्थ्य मन्त्रालयकै कर्मचारीले खुलासा गरे । यसरी शाहले बैद्यखानाको रसको राम्ररी स्वाद पाएका थिए ।

रामनारायण साहको पुख्र्यौली घर महोत्तरी जिल्लाको एकडारा गाउँपालिका– २ हो । बालेन यहाँसम्म प्रचारको पछि लाग्छन् भन्ने विषयमा आफ्नो कारमा लेखिएको बालेनको कम्पनीको ओ लाई मेटेर बालेन लेखेका छन् । यसैबाट उनी कति प्रचारका भोका छन् भन्ने कुराको प्रष्ट झल्किन्छ । जबकि उनका बाबु रामनारायण प्रमाणपत्र कीर्ते र भ्रष्टाचारको आरोपमा निलम्बन भएका हुन् ।

पाँच बर्ष निलम्बनमा परेका शाहलाई सर्वोच्च अदालतका न्यायाधीश दामोदर शर्माले भ्रष्टाचार मुद्दामा जिताइदिएका थिए । पूर्व प्रधानन्यायाधीश शर्मा न्यायालयमा अत्याधिक विवादमा आएका प्रधानन्यायाधीश हुन् । उनी अहिले गाई पालेर भारतको हरिद्वारमा बसेका छन् ।

शर्माकै कारण सर्वोच्च अदालतमा न्यायाधीशहरु गोपाल पराजुली, दीपकराज जोशी, चोलेन्द्रशम्शेर जवरा, ओमप्रकाश मिश्र जस्ता नियुक्ति भए । जसका कारण सिंगो न्यायालयको नै शाख गिर्न पुग्यो । योग्य र इमान्दार न्यायाधीशहरु केशरीराज पाण्डे, जागेश्वर सुवेदी, अलि अकबर मिकरानीहरुलाई तत्कालीन पुनरावेदन अदालतको प्रमुखबाट सर्वोच्च आउन नपाइ बिदाई गरियो ।

त्यसैगरी सर्वोच्च अदालतका काबिल योग्य र इमान्दार न्यायाधीश भनेर चिनिएका प्रकाश वस्ती करार म्याद न नथपिदिएपछि बाहिरिन बाध्य भए ।

नगरप्रमुख बालेनले भ्रष्टाचार गरेको भन्दै आफ्नै प्रमुख प्रशासकीय अधिकृत सरोज गुरागाईंलाई २०८१ साल पुस ८ गतेपछि कार्यकक्षमा ताला लगाएर हाजिर गर्न रोकेका थिए ।
प्रमुख प्रशासकीय अधिकृत गुरागाईंविरुद्ध उनले छानविन गर्न समिति नै बनाएपनि कुनै दोष नदेखिएपछि प्रतिवेदन नै सार्वजनिक गरिएन । यसैकारण संघीय मामिला मन्त्रालयले पुनः काठमाडौं महानगरपालिकामै पठाएर हाजिर गर्न निर्देशन दियो । त्यसपछि उपप्रमुख सुनिता डंगोलको नेतृत्वमा ताला फोडेर हाजिर गराइएको थियो ।

लामो समय कर्मचारी र जनप्रतिनिधिहरुले तलब भत्ता नपाएपछि अस्तब्यस्त भएको महानगरपालिकालाई जनप्रतिनिधि र कर्मचारी मिलेर प्रमुख प्रशासकीय अधिकृतलाई हाजिर गराएका थिए । प्रमुख बालेन भने प्रमुख प्रशासकीय अधिकृतको मातहतमा रहने नगरप्रहरीलाई गलत आदेश दिएर काभ्रेतिर घुमघामका लागि गएका थिए ।

काठमाडौं महानगरका प्रमुख बालेन साहले चैत १५ गते तीनकुनेमा भएको प्रदर्शनका क्रममा गरिएको फोहोर बापत पूर्व राजा ज्ञानेन्द्रलार्ई सार्वजनिक सम्पत्ति तोडफोड लगायत अन्य कुरामा रु. ७ लाख ९३ हजार जरिवाना तिराउनेगरी पत्र पठाएका थिए । त्यो पत्र पूर्वराजाको सचिवालयले बुझ्न नमानेपछि हुलाकबाट पठाइएको बताइन्छ । जबकि त्यो कार्यक्रमको आयोजक दुर्गा प्रसाईको राष्ट्र राष्ट्रियता र धर्म संस्कृति बचाऔं महाअभियान र नवराज सुवेदी संयोजक रहेको राजसंस्था पुनःस्र्थापनाका लागि संयुक्त जनआन्दोलन परिचालन समितिले कार्यक्रममा लागि जिल्ला प्रशासन कार्यालय काठमाडौंमा अनुमति नै लिएर कार्यक्रम गरेको थियो ।

बालेनका नगर प्रहरीका ज्यादतीका कारण फुटफाथ ब्यापारी शान्त गिरीले आत्महत्या गर्न बाध्य भएको भूगोलपार्कका एक ब्यापारी बताउँछन् । तथापि राजु पाण्डे नेतृत्वको नगर प्रहरीको ज्यादती रोकिएको छैन । अझै बढोत्तरी भइरहेको छ । आफ्नै डिजाइनमा गरिएको सिंहदरबार, सर्वोच्च अदालत, प्रधानमन्त्री कार्यालय, गृहमन्त्रालय, संसद भवन, अन्तर्राट्रिय सम्मेलन केन्द्रलगायतका सयौं सरकारी संरचनाहरु, भाटभटेनी, हिल्टन होटल, युलेन्स स्कूललगायतका निजी ब्यवसायिक प्रतिष्ठान र संस्थाहरु, नेपाल प्रहरीका कार्यालयहरु खरानीमा परिणत भएका छन् ।

यो हिंसामा भएको क्षतिको बालेन्द्र साहलाई कसले कहिले जरिवाना तिराउने ? भविष्यमा त्यो दिन पनि नआउला भन्न सकिदैन । काठमाडौंका जनतालाई नेपाली कांग्रेसका नेता गणेशमान सिंहले भेडाको संज्ञा दिएका थिए । यस्तै प्रबृत्तिलाई गणेशमानले चित्रित गरेका थिए होलान् । ६१७६७ मतले बालेन्द्र विजयी बनेका थिए भने उनै गणेशमान सिंहकी बुहारी सिर्जना सिंहले नेपाली कांग्रेसका तर्फबाट उक्त निर्वाचनमा ३८३४१ मत ल्याएकी थिइन् । तेस्रो स्थानमा एमालेका केशव स्थापितले ३८११७ र चौथो स्थानमा स्वतन्त्र उम्मेदवार सुमन सायमीले १३७७० मत पाएका थिए । डायरी एक्सप्रेस साप्ताहिकबाट साभार