हरियो रङ्गको ‘बुलेटप्रुफ’ रेल चढेर चीन पुगे किम

एजेन्सी । उत्तर कोरियाका नेता किम जोङ उन चीन पुगेका छन् । चीनले बुधबार बेइजीङमा आयोजना गर्ने सैन्य परेडमा सहभागी हुन उनी आफ्नो विशेष रेलबाट मंगलबार बिहान चीन प्रवेश गरेका हुन् ।

सोमबार प्योङयाङबाट हिँडेका किम मंगलबार बिहान चीन प्रवेश गरेको उत्तर कोरियाको सरकारी पत्रिका रोदोङ सिन्मुनले जनाएको छ । रोदोङ सिन्मुनले किम, परराष्ट्र मन्त्री चो सोन हुई लगायत उनका सहयोगीहरूसँगको तस्बिरहरू पनि छापेको छ ।

तस्बिरमा उनीहरू अँध्यारो हरियो रङ्गको रेलभित्रको डेस्कमा बसेर मुस्कुराउँदै गरेका देखिन्छन् । यो रेल किमले यसअघि अन्य देशहरूमा यात्रा गर्न प्रयोग गरेको ‘बुलेटप्रुफ’ रेलजस्तै देखिन्छ भनेर समाचार संस्था रोयटर्सले जनाएको छ ।

शत्रुहरूले हवाइजहाजमा यात्रा गर्दा आक्रमण गर्न सक्ने ठानेर किमका बुवा किम जोङ इल र हजुरबुवा किम इल सुङले रेल यात्राको परम्परा बसालेका थिए । त्यही परम्परालाई निरन्तरता दिंदै किम जोङ उन पनि सुविधा सम्पन्न विशेष रेलमा यात्रा गर्छन् ।

बेजिङमा हुने सैन्य परेडमा किमसँगै चिनियाँ राष्ट्रपति सी चिनफिङ, रूसी राष्ट्रपति भ्लादिमिर पुटिन, इरानी राष्ट्रपति मसुद पेजेस्कियान लगायत विभिन्न देशका राष्ट्र र सरकारप्रमुख सहित सहभागी हुनेछन् ।

सांघाई कोअपरेसन अर्गनाइजेसनको शिखर सम्मेलनमा भाग लिन हाल चीन भ्रमणमा रहेका प्रधानमन्त्री केपी शर्मा ओली पनि सो परेडमा सहभागी हुनेछन् ।