निजामती विधेयक राष्ट्रिय सभामा सञ्चार मन्त्रीले पेश गर्ने

काठमाडौँ । प्रतिनिधि सभाबाट पारित भएर राष्ट्रिय सभामा पेश भएको संघीय निजामती सेवा विधेयक राष्ट्रिय सभाको मंगलवारको बैठकमा प्रस्तुत हुने भएको छ ।

मंगललवार राष्ट्रिय सभाको बैठकको कार्यसूचीको दोस्रो नम्बरमा संघीय निजामती सेवा विधेयकमाथि विचार गरियोस् भन्ने प्रस्ताव रहेको छ ।

प्रतिनिधि सभाबाट सन्देश सहित प्राप्त उक्त विधेयकमाथि विचार गरियोस् भन्ने प्रस्ताव संघीय मामिला तथा सामान्य प्रशासन मन्त्री राजकुमार गुप्ताले प्रस्तुत गर्ने कार्यसूची रहेको थियो । तर, घुस लेनदेनबारे कुराकानी गरेको अडियो सार्वजनिक भएसँगै मन्त्री गुप्ताले मंगलवार बिहानै प्रधानमन्त्री केपी शर्मा ओली समक्ष राजीनामा दिइसकेका छन् ।

मन्त्री गुप्ताले राजीनामा दिएसँगै संघीय निजामती विधेयकमाथि छलफल गरियोस् भन्ने प्रस्ताव सञ्चार तथा सूचना प्रविधि मन्त्री पृथ्वी सुब्बा गुरुङले प्रस्तुत गर्ने भएका छन् ।

विधेयकमाथिको सैद्धान्तिक छलफलमा सांसद आनन्दप्रसाद ढुंगाना, जगप्रसाद शर्मा, जयन्तीदेवी राई, मोहम्मद खालिद, शेखरकुमार सिंह, दुर्गा गुरुङ, राजेन्द्रलक्ष्मी गैरे, राधेश्याम पाश्वान र सोनाम गेल्जेन शेर्पाले भाग लिने गरी नाम दर्ता गराएका छन् । विधेयकमाथि करिब डेढ घण्टा छलफल हुने कार्यसूची रहेको छ ।