बजेट पुस्तीका पढेर मात्र संसदमा कुरा उठाउन सहरी विकास मन्त्रीको अनुरोध

काठमाडौँ । उपप्रधानमन्त्री तथा सहरी विकास मन्त्री प्रकाशमान सिंहले सांसदहरुले बजेट पुस्तीका राम्रोसँग पढेर मात्र संसदमा कुरा उठाउन अनुरोध गरेका छन् ।

मंगलबार सहरी विकास मन्त्रालय अन्तर्गत विनियोजन गरिएको बजेटबारे सांसदहरुले उठाएको प्रश्नहरूको जबाफ दिँदै उनले उक्त कुरा बताएका हुन् ।

उनले भने, ‘रामेछाप जिल्लामा ० दशमलव ८ प्रतिशत जनसङ्ख्या भएकोमा सहरी विकास मन्त्रालयमार्फत ० दशमलव ७ प्रतिशत बजेट विनियोजन गरिएको छ, सरकारले आवश्यकताको आधारमा बजेट विनियोजन गरेको हो, त्यसैले बजेट पुस्तीका पढेर संसदमा कुरा उठाउन अनुरोध गर्दछु ।’

सोमबार संसदमा रामेछापबाट निर्वाचित नेपाली काँग्रेसका सांसद पूर्णबहादुर तामाङले सहरी विकास मन्त्री सिंहले रामेछापमा बजेट योजनाको वितरणमा आवश्यकताको आधार नअपनाएको आरोप लगाएका थिए ।

उनले भनेका थिए, “काठमाडौँ बसेर काठमाडौँकै योजना मात्रै ल्याउने प्रकाशमान सिंह देशभरिको नेता बन्न सक्नुहुन्न, उहाँले रामेछापमा बजेट वितरण गर्दा आवश्यकता भन्दा कम वितरण गर्नुभयो ।” तामाङले बजेट वितरणको असमानताको विरोध गर्दै पार्टीभित्र यसको हिसाब–किताब १५औँ महाधिवेशनमा हुने चेतावनी समेत दिएका थिए ।