रौतहटमा अवैध समान बोकेको ट्रकसहित एकजना प्रहरी नियन्त्रणमा

रौतहट । रौतहटमा प्रहरीले विशेष चेकजाँचका क्रममा बिलविजक भन्दा बढी परिमाणमा सामान बोकेको ट्रक नियन्त्रणमा लिएको छ।

जिल्ला प्रहरी कार्यालय गौर र इलाका प्रहरी कार्यालय चन्द्रनिगाहपुरबाट खटिएको प्रहरी टोलीले आज बिहान ४ बजे तिर चन्द्रपुर नगरपालिका–४ स्थित चन्द्रनिगाहपुर नजिकै चेकजाँचका क्रममा सो ट्रकलाई नियन्त्रणमा लिएको हो।

प्रहरीका अनुसार ना ४ ख ७८६७ नम्बरको ट्रकमा बिलविजकभन्दा बढी परिमाणमा विभिन्न किराना र कपडाका सामग्रीहरू राखिएको पाइएको छ। नियन्त्रणमा लिइएको ट्रक र ट्रक चालक हरिहरनगर नगरपालिका–१ का २० वर्षीय जय दास सत्रियलाई थप कारबाहीको लागि आन्तरिक राजस्व कार्यालय, पथलैया पठाइएको छ।

अनुमानित ४५ लाख ५६ हजार रुपैयाँ बराबरको सरसामान बिना कागजात राखिएको भन्दै प्रहरीले सो सम्बन्धमा अनुसन्धान अगाडि बढाएको जनाएको छ।

घटनाबारे जानकारी दिँदै जिल्ला प्रहरी कार्यालयका प्रवक्ता तथा डिएसपी दिपक कुमार रायले आवश्यक करछलीको अनुसन्धानको लागि ट्रक र सामान सम्बन्धित निकायमा बुझाइएको बताए ।