प्रतिगमनबिरुद्ध विशाल बिरोध प्रदर्शनः काठमाडौंमा १ लाख मानिस उतार्ने तयारी 

काठमाडौं । प्रधानमन्त्री केपी ओलीले प्रतिनिधिसभा बिघटन गरेको बिरोधमा आन्दोलनरत नेपाल कम्युनिष्ट पार्टी(नेकपा)को प्रचण्ड माधव समूहले आज काठमाडौंमा बिशाल बिरोध प्रदर्शन गर्दैछ । बिरोध प्रदर्शन कार्यक्रमलाई सुब्यवस्थित र अनुशासित बनाउनका लागि नेकपा केन्द्रीय संघर्ष समितिले सात बुँदे निर्देशिका जारी गरेको छ । आजको बिरोध प्रदर्शनपछि रत्नपार्क शान्तिबाटिकामा सभा हुनेछ ।

सभालाई नेकपा अध्यक्षद्धय माधवकुमार नेपाल र पुष्पकमल दाहाल प्रचण्ड लगायतका नेताहरुले सम्बोधन गर्ने कार्यक्रम छ । आजको बिरोध प्रदर्शनका लागि नाराहरु पनि तय गरिएका छन् । तय गरिएको नारामात्र लगाउन नेकपाका प्रवक्ता तथा संघर्ष समितिका संयोजक नारायणकाजी श्रेष्ठले जारी गरेको निर्देशिकामा उल्लेख छ ।

निर्देशिकामा प्रत्येक प्रदेश, जिल्ला, जनवर्गीय संगठनलाई बिरोध प्रदर्शनमा तोकिए अनुसारको संख्या उपस्थित गराउनुपर्ने उल्लेख छ ।

त्यसैगरी १०.४५ बजेसम्म आफ्नो छुट्याइएको आर्कमा अनिवार्य भेला भैसक्नुपर्ने र उपत्यका बाहिरबाट आउनेहरुले १०.४५ बजेसम्म बिरोध प्रदर्शन गर्नका लागि छुट्याइएको निर्धारित आर्कमा उपस्थित हुनुपर्नेछ ।

बिरोध प्रदर्शनमा आउनेहरुका लागि आर्क समेत तोकिएको छ । जस अनुसार माइतीघरमा निर्वाचन क्षेत्र नम्बर १ र २ तथा भक्तपुर, काभ्रे, सिन्धुपाल्चोक, दोलखा, रामेछाप, सिन्धुली जिल्ला, पेशागत, प्रेस संगठन, बुद्धिजीवी, प्राध्यापक, वकिल, इन्जीनीयर, शिक्षक र प्रदेश नम्बर २ का लागि तोकिएको छ ।

डिल्लीबजार चारखालमा काठमाडौं निर्वाचन क्षेत्र नम्बर ३, ४ र ५ का लागि तोकिएको छ । लैनचौरमा काठमाडौं क्षेत्र नम्बर ६ र ७ को जुलुस जम्मा हुनेछ । त्रिपुरेश्वर काठमाडौं निर्वाचन क्षेत्र नम्बर ८, ९ र १० को लागि तोकिएको छ ।

त्यसैगरी, कुपण्डोलमा ललितपुर जिल्ला कमिटी, खेलकुद र सुकुम्बासीका लागि छुट्याइएको छ । प्रदर्शनीमार्ग सम्पर्क कमिटी, आदिवासी जनजाति र बाँकी सबै जनवर्गीय संगठनहरुको भेला भई बिरोध प्रदर्शनमा सामेल हुनेछ । शान्बिाटिकामा मजदुर, त्रिचन्द्र कलेजमा विद्यार्थी र बाल्मिकी क्याम्पसमा पेशागत सबै जम्मा भई बिरोध प्रदर्शनमा सहभागी हुनेछन् ।

आजको बिरोध प्रदर्शनमा कम्तीमा १ लाखको संख्यामा नागरिककको सहभागिता हुने नेकपाका केन्द्रीय सदस्य बिष्णु रिजालले बताए ।