कुमारी बहुउद्देश्यीय सहकारीका पूर्वसञ्चालक लोकेश पक्राउ

म्याग्दी – म्याग्दीको बेनीमा सञ्चालित कुमारी बहुउद्देश्यीय सहकारी संस्थाको पूर्वसञ्चालक लोकेश पुनमगरलाई प्रहरीले पक्राउ गरेको छ । सहकारीको एक अर्ब ४९ करोड अपचलनमा संलग्न भएको अभियोगमा प्रहरीले बेनी नगरपालिका–४ का पुनमगरलाई पक्राउ गरेकोहो ।

उनलाई बिहीबार जिल्ला अदालत म्याग्दीबाट फागुन १३ गतेसम्मका लागि म्याद थप गरी हिरासतमा राखिएको जिल्ला प्रहरी कार्यालयले जनाएको छ । प्रहरी निरीक्षक सागर पौडेलले मङ्गलबार पक्राउ परेका पुनलाई यसअघि माघ २० गते पक्राउ परेका अन्य पाँच जनासँगै अदालत उपस्थित गराउने गरी म्याद थप भएको बताए ।

पोखरास्थित सहकारी रजिष्ट्रारको कार्यालयका अनुसार छ हजार बचतकर्ता रहेको कुमारी सहकारीको रु एक अर्ब ४९ करोड अपचलनमा संलग्न पुनलगायत अभियुक्तविरुद्ध सहकारी ऐन–२०७४ अनुसार कारबाही थालिएको हो ।