वीमा प्राधिकरणाका अध्यक्ष सिलवालबिरुद्ध नागरिकता कीर्तेमा मुद्दा दायर, हिमालयन रिइन्स्योरेन्सको लाइसेन्समा छानबिन होला ?

काठमाडौं । नागरिकतामा जन्ममिति सच्याएको तथ्य खुलेपछि नेपाल बीमा प्राधिकरणका अध्यक्ष सूर्यप्रसाद सिलवालका बिरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ ।

नागरिकतामा पटक पटक जन्म मिति संशोधन गरी केरमेट र जालझेल गरेको प्रमाणसहितको उजुरीका आधारमा अख्तियारले सिलवालबिरुद्ध अनुसन्धान अगाडि बढाएको थियो । दुई पटक नागरिकता संशोधन गर्दै फरक फरक निकायमा फरक फरक जन्ममितिका नागरिकता उनले पेश गरेको तथ्य अख्तियारको अनुसन्धानमा खुलेको थियो ।

प्राधिकरणका अध्यक्ष सिलवालले नागरिकता र पासपोर्टमा दुई वर्षको फरक–फरक जन्ममिति राखेर बनाएको तथ्य अख्तियारको अनुसन्धानबाट देखिएको छ । सिलवालले पछिल्लो समय गृह मन्त्रालयको सचिव भएको समयमा नागरिकता संशोधन गरेका थिए ।

पर्सा जिल्लाको अलौमा जन्मिएका सूर्यप्रसाद सिलवालको पछिल्लो पटक चलनचल्तीमा रहेको नागरिकता नं २६०–९९७३ हो । अर्थ मन्त्रालयमा हाल कायम रेकर्डमा उनको सोही नयाँ नागरिकता समावेश छ । सो नागरिकता अनुसार सिलवालको जन्म २०१६ साल कार्तिक २२ गते भएको देखिन्छ ।

अध्यक्ष सिलवालले निर्वाचन आयोगमा नागरिकताकै आधारमा गरेको मतदाता नामावली दर्तामा समेत उनको जन्ममिति नयाँ नागरिकता अनुसार अर्थात २०१६ कात्तिक २२ नै रहेको उल्लेख छ । तर, अध्यक्ष सिलवालले राहदानी विभागबाट लिएको राहदानी नं ०९०४००७६ मा उनको जन्म स्थान पर्सा र जन्ममिति नोभेम्वर ९, १९६१ अर्थात २०१८ साल कार्तिक २४ गते उल्लेख छ । उनले सोही पासपोर्ट प्रयोग गरेर केही अघि विदेश यात्रा समेत गरेका थिए । उनको नागरिकता र पासपोर्टमा दुई वर्ष दुई दिन जन्ममिति फरक रहेको छ ।

सिलवालले २०७८ मा हिमालयन रि–इन्स्योरेन्सको अनुमतिपत्र दिंदा १ अर्ब घुस लिएको बिषय पनि सार्वजनिक संचारमाध्यमले उठाउँदैआएका छन् ।

त्यस्तै, हिमालयन रिइन्स्योरेन्सलाई आधारभूत रकम १ सय रुपैयाँमा थप १ सय ६ रुपैयाँ प्रिमियम मूल्य थपेर आईपीओ जारी गर्न अनुमति दिंदा पनि करोडौको घुस लेनेदन गरेको आरोप सिलवालमाथि लागेको छ । सिलवालले ८ वटा लघुवीमाको लाइसेन्स दिंदा पनि करोडौंको आर्थिक लेनदेन गरेको आरोप लागेको थियो ।

वीमा कम्पनी धेरै भएर बजार नभएपछि मर्जरमा जान लागेका छन् । तर सिलवालले कार्यकालको अन्तिममा थप बीमा कम्पनीलाई लाइसेन्स दिनका लागि सेटिङ गरिसकेको अवस्थामा अख्तियारले मुद्दा दायर गरेकाले उनी निलम्बनमा परेका छन् । उनको कार्यकाल ०८१ माघसम्म छ । माघ अघि नै उनी वीमा कम्पनीलाई लाइसेन्स दिएर जाँदाजाँदै थप करोडौं घुस असुल्ने दाउमा थिए ।

निजामती प्रशासनमा पनि अति नै बदनाम रहेका सिलवाललाई पूर्वगृहमन्त्री बामदेव गौतमले गृहमन्त्रालयको सचिवमा ल्याएका थिए ।