भेटी चोर्ने जेल पुगे, भारतीयसँग असुल्ने सशस्त्रका घुमुवालाई कसले रोक्ने ?

काठमाडौं । विश्वभरका हिन्दू धर्मावलम्बीहरु पशुपतिनाथको मन्दिर दर्शन गर्न नेपाल आउने गर्दछन् । पशुपतिनाथको दर्शन गर्नेमा सबैभन्दा बढी भारतीय पर्यटकहरु हुन् । पशुपति दर्शन गर्नका लागि आउने भारतीय पर्यटकहरुलाई मन्दिर दर्शन गर्न सहजीकरण गर्नुपर्ने दायित्व पूरा गर्नका लागि पशुपति विकास कोषदेखि राज्यका बिभिन्न निकायले काम गरिरहेका छन् ।

यसैक्रममा भेटी चोरेको घटना सेलाउन नपाउँदै भारतीय पर्यटकहरुसँग सशस्त्र प्रहरीले नै घुमुवा परिचालन गरी रकम लिने गरेको आरोप लागेको छ ।

नेपाल प्रहरी र सशस्त्र प्रहरी बलको टोलीलाई पशुपतिमा आउने स्वदेशीदेखि विदेशी पर्यटकको सुरक्षार्थ तैनाथ गरिएको छ । पर्यटकको सुरक्षाका लागि सशस्त्र प्रहरी निरीक्षकको नेतृत्वमा पशुपतिमा मन्दिर सुरक्षा बेस नै राखिएको छ । तर मन्दिर सुरक्षाका लागि राखिएको सुरक्षा बेसकै सशस्त्र प्रहरीले भारतीय पर्यटकसँग पैसा माग्ने गरेको गुनासो छ ।

स्रोतका अनुसार मन्दिर दर्शन गराउन सहजीकरण गरेबापत उनीहरुले भारतीय पर्यटकसँग रकम लिने गरेका छन् । पशुपति मन्दिरमा रहेको सशस्त्रको बेसका इन्स्पेक्टर दीपेन्द्र खड्का गएको जेठ ८ गते हाजिर भएका हुन् । उक्त बेसमा कार्यरत ४ जना सशस्त्रका तल्लो दर्जाका जवान र हवल्दारलाई घुमुवाका रुपमा खटाई भारतीय पर्यटकहरुलाई मन्दिर घुमाउन सहयोग गर्ने भनेर सिधै बेस इन्चार्जकोमा लाने गरेका छन् । त्यहाँ लगेर मन्दिर दर्शन गराउनका लागि ३ हजार ५ सयदेखि ५ हजार रुपैयाँ असुल्ने गरेका छन् ।

वरिष्ठ हवलदार रमेश कार्की, हवल्दार पुरुषोत्तम दाहाल, ऋषि बरुवालसहितका सादा पोशाकमा खटिएका घुमुवाले भारतीय पर्यटकलाई मन्दिर घुमाउने रकम असुल्ने गरेको स्रोतको भनाइ छ । यी चारै जना २ बर्षभन्दा बढी समयदेखि पशुपति मन्दिर सुरक्षार्थ स्थापित बेसमा कार्यरत छन् । जबकि ६–६ महिनामा त्यहाँ फेरबदल हुने गरेको छ । सबै सेटिङ मिलाएर उनीहरु २ बर्ष भन्दा बढी समयदेखि बस्दै आएका छन् । इन्स्पेक्टर खड्काले नै उनीहरुलाई भारतीय पर्यटकसँग असुलीमा लगाएको आरोप छ ।