गिरीबन्धुको कुरा बालेनलाई सोध्नुः केपी ओली

काठमाडौं । नेकपा एमालेका अध्यक्ष केपी शर्मा ओलीले गिरीबन्धु टी इस्टेटको हदबन्दी फुकुवा प्रकरणका बारेमा बालेन साहसँग सोध्न सुझाव दिएका छन् ।
बालेन साहले सोमबार बिहानमात्रै ओलीले गिरीबन्धुको जग्गा मिलाउने भनेर ब्यापारीहरुलाई थामथुम पारिरहेको बिषयमा फेसबुकमा स्टाटस लेखेका थिए ।

पत्रकारहरुले सोमबार संसद भवन गिरीबन्धु टि इस्टेटको कुराका बारेमा सोधेको प्रश्नमा ओलीले बालेनलाई सोध्नु भनेका छन् । गिरीबन्धु टी इस्टेटको ३ सय ४३ बिघा जग्गा ओली प्रधानमन्त्री हुँदा भूमि ऐन संशोधन गरेरै हदबन्दी फुकुवा गर्न लागिएको थियो ।

सर्वोच्च अदालतको संवैधानिक इजलासले उक्त जग्गाको हदबन्दी फुकुवा नगर्न आदेश दिएपछि एमाले अध्यक्ष ओलीको चौतर्फी आलोचना हुँदैआएको छ । गिरीबन्धुको हदबन्दी फुकुवामा करोडौं आर्थिक चलखेल भएको बिषय संसददेखि सडकसम्म गुन्जिरहेको छ ।