प्रचण्ड सरकारको विकल्प छैन : वर्षमान पुन

काठमाडौं । नेकपा माओवादी केन्द्रका उपमहासचिव वर्षमान पुनले सरकारको विकल्प नरहेको दाबी गरेका छन् । आज हेटौँडामा प्रेस सेन्टर मकवानपुरले आयोजना गरेको पत्रकार सम्मेलनमा बोल्दै उनले यस्तो बताएकी हुन् ।

सत्ता गठबन्धनका केही दलभित्र सरकारको विकल्पका विषयमा केही टिका टिप्पणी भए पनि त्यसले कुनै अर्थ नराख्ने उनले बताए ।

‘वर्तमान सरकारको विकल्प छैन । गठबन्धनका दलका केही नेताहरूले फरक ढङ्गबाट विषयहरू उठाए पनि अहिले नै सरकार परिवर्तनको सम्भावना भने छैन’ उनले भने ।

उपमहासचिव पुनले सरकारले राम्रा काम गर्न खोज्दा चौतर्फी रूपमा आक्रमण र घेराबन्दीमा भइरहेको बताए । प्रचण्ड नेतृत्वको सरकारले सुशासनका सन्दर्भमा थुप्रै कामहरू गरेको तर, सो कामहरू पर्याप्त नहुने उनको भनाई छ ।

उनले माओवादी केन्द्र रूपान्तरणसहित नयाँ शक्तिको रूपमा उभिने रणनीतिअनुसार अघि बढेको उपमहासचिव पुनले बताए ।

पछिल्लो समय बाहिरिएका रिपोर्ट कार्डहरू अनुसार माओवादी नेतृत्वको सरकारको काम काम कारबाही सन्तोषजनक नरहेको र जनताको अपेक्षाअनुसार सरकारले आफ्नो गतिलाई बढाउन जरुरी रहेको उनले बताए । सरकारले सोचेजस्तो खर्च गर्न नसकेको र खर्च प्रणालीलाई पुनः संरचना गरी अघि बढ्नुपर्ने उनको भनाई छ ।

माओवादी सरकारको नेतृत्वमा पहाडी जिल्लाहरूलाई आर्थिक समृद्धिमा जोड्न माध्य पहाडी राजमार्ग, भित्री मधेसको विकासका लागि धरान चतरा सडक खण्ड निर्माण गरिएकोले त्यसको प्रभाव देखिन थालेको उनले बताए । उनले देशको अर्थतन्त्रमा निकै सुधार आएको बताए ।