प्राध्यापककी छोरी उत्तीर्ण गराउन विराटनगरमा उत्तरपुस्तिका साटेको भन्दै परीक्षा नियन्त्रकको गाडीमा आगजनी

विराटनगर । मोरङको विराटनगरस्थित महेन्द्र मोरङ क्याम्पसका प्राध्यापक राजन दत्तले उत्तरपुस्तिका साटफेर गरेको भन्दै विवाद चर्किएको छ ।

स्नातक तहको पहिलो वर्षको परीक्षा दिएकी आफ्नी छोरीको उत्तरपुस्तिका दत्तले साटफेर गरेको विद्यार्थीको आरोप छ । विद्यार्थी सन्ध्या कायस्थको उत्तरपुस्तिका दत्तकी छोरी आस्थाको बनाइएको आरोप लगाइएको हो ।

परीक्षामा दत्तकी छोरी उत्तीर्ण भएकी छन् । दत्त सोही क्याम्पसमा अंग्रेजी विषयका प्राध्यापक हुन् ।

अंग्रेजी विषयको उत्तरपुस्तिका साटफेर गरिएका कारण सन्ध्या अनुत्तीर्ण भएको विद्यार्थी संगठनको आरोप छ । विवादपछि विद्यार्थीले बुधबार पार्किङ गरेर राखिएको बा१७च ८२३८ नम्बरको त्रिभुवन विश्वविद्यालय परीक्षा नियन्त्रकको गाडीमा आगजनी गरेका छन् ।

नियमित उत्तीर्ण हुने विद्यार्थीको रिजल्ट नकारात्मक आएपछि क्याम्पस प्रशासनले पुनः परीक्षा लिएको तर नतिजा नआएकाले आफू तनावमा परेको सन्ध्याले बताइन् । उनले भनिन्, “फेरि ब्याक लागेको विषयको पनि दिऊँ, तर रिजल्ट आएको छैन ।”

आफूले थप गरेको चार पानाको विवरण मूलकापीमा समेत लेखेको तर त्यो च्यातिएको पाइएको उनको भनाइ छ ।

रिटोटलिङ गर्दा पहिलेकै प्राप्तांक देखिएको र उत्तरपुस्तिका हेर्न परीक्षा नियन्त्रण कार्यालयमा निवेदन दिँदा थप गरिएका पेज नरहेको पाएको उनले सुनाइन् । उनले भनिन्, “मेरो हराएको थप उत्तरपुस्तिका दत्तको कापीमा अट्याच्ड गरेको भन्नेमा म ढुक्क छु ।”

दोस्रो वर्षको परीक्षामा भने आफू उत्तीर्ण भएको उनले बताइन् ।