सुजुकी गाडीको ठगीधन्दालाई प्रहरीको संरक्षणः करोडौं ठगी, बैंकले निकाल्यो लिलामीको सूचना

भरतपुर । चितवनस्थित सुजुकी गाडीको आधिकारिक बिक्रेताले ९७ वटा गाडी बिक्री गरिसकेपछि पनि ग्राहकको नाममा नामसारी नगरेको खुलासा भएको छ । ग्राहकले पूरा रकम तिरेर किनेका गाडी हिमालयन बैंक भरतपुर शाखाले लिलाम गर्नका लागि ३५ दिने सूचना निकालेपछि खरिदकर्ताहरुले ठगिएको थाहा पाए ।

गाडी खरिदकर्ताहरुले ठगिएको थाहा पाएपछि चितवनस्थित सुजुकी गाडीको आधिकारिक बिक्रेता कम्पनीका प्रमुख प्रतीक श्रेष्ठका बिरुद्ध जिल्ला प्रहरी कार्यालय चितवनमा केही दिनअघि ठगीमा उजुरी दिए । ठगीको उजुरीमा प्रहरीले उनलाई पक्राउ गरी तुरुन्तै आर्थिक चलखेलमा छाडेको छ । र, ९७ जनासँग कराडौं लिएर पनि गाडी नामसारी नगर्ने श्रेष्ठका बिरुद्ध परेको ठगीसम्बन्धी उजुरीमा चितवनका एसपी रामेश्वर कार्कीकै अग्रसरतामा दबाब दिएर मिलापत्र गराइएको गुनासो पीडितले गरेका छन् ।

३ महिनाभित्र भुक्तानी गर्नेगरी उजुरी दिने ११ जनालाई चेक दिएर मिलापत्र गराएको भए पनि त्यसपछि प्रतीक श्रेष्ठ सम्पर्कमा नै नआएको पीडितहरुको गुनासो छ । प्रतीक श्रेष्ठ र उनका सहयोगी जेम्स चौधरीले हिमालयन बैंक शाखा कार्यालय भरतपुरबाट ५२ करोड  रुपैयाँ ऋणमा ९७ वटा सुजुकी गाडी बिक्रीका लागि सोरुममा राखे । ९७ वटै गाडी बिक्री गरी ग्राहकहरुबाट त्यसबापतको भुक्तानी समेत लिए । ग्राहकबाट पैसा लिए पनि गाडी पास गर्न आज भोलि भन्दै झुलाउँदै लगे । ग्राहकबाट पैसा लिएर पनि प्रतीक श्रेष्ठले हिमालयन बैंकको ऋणको साँवा ब्याज नै नतिरेपछि हिमालयन बैंक भरतपुर शाखाले ९७ वटै गाडी लिलाम गर्ने ३५ दिने सूचना निकाल्यो ।

बैंकले लिलामीको सूचना निकालेपछि गाडी खरिद गर्नेहरु आक्रोशित भए । डा. सन्दीप साहसहित ११ जनाले जिल्ला प्रहरी कार्यालय चितवनमा प्रतीक श्रेष्ठका बिरुद्ध ठगीमा उजुरी नै हाले । प्रहरीले श्रेष्ठलाई पक्राउ गर्यो । श्रेष्ठलाई पक्राउ गरिसकेपछि उजुरी दिनेमध्येका डा. सन्दीप साहलाई ३८ लाख रुपैयाँ दिन लगाइयो ।  र, अरु उजुरीकर्तालाई प्रतीक श्रेष्ठका भाइसहितको रोहबरमा ३ महिनाभित्र गाडी नामसारी गर्नेगरी मिलापत्र गराइयो । कतिपय उजुरीकर्तालाई चेक दिएका प्रतीक प्रहरी कार्यालयबाट छुटेपछि पीडितको सम्पर्कमा आउन नचाहेको पीडितको गुनासोपत्रमा उल्लेख छ । उनी सम्पर्कमा नआएपछि ठगिएकाहरु पैसा फिर्ता हुने कुरामा आशंका प्रकट गर्न थालेका छन् । ग्राहकलाई बिक्री गरिसकेपछि गाडी नामसारी नगर्ने श्रेष्ठलाई जिल्ला प्रहरी कार्यालय चितवनले आर्थिक चलखेलमा छाडेको आरोप छ । श्रेष्ठ प्रहरीको हिरासतबाट मुक्त भएपछि उनका सहयोगी जेम्स चौधरी फरार भएका छन् । चौधरीलाई श्रेष्ठले नै फरार गराएको आरोप छ ।

नेपाल प्रहरीले उत्कृष्ट अधिकृतका रुपमा पुरस्कृत गरेका जिल्ला प्रहरी कार्यालय चितवनका प्रहरी प्रमुख  एसपी रामेश्वर कार्कीमाथि नै प्रतीक श्रेष्ठलाई आर्थिक चलखेलमा छाडेको आरोप लागेको छ । गाडी किनेका तर नामसारी नभएका पीडितहरुको गुनासोपत्रमा १० लाख रुपैयाँको चलखेलमा ठगीमुद्दामा मिलापत्र गराई छाडिएको उल्लेख छ । बैंकिङ कसुर शाखाका सई राम कार्कीको सेटिङमा प्रतीक श्रेष्ठ छुटेको स्रोतले बताएको छ । स्रोतका अनुसार अहिले टोकन स्वरुप १० लाख र पछि थप दिनेगरी ठगी गर्ने श्रेष्ठलाई छाडिएको छ ।

प्रतीक श्रेष्ठलाई छाडिएकोबारेमा एसपी कार्कीले भने–‘प्रतीक श्रेष्ठलाई उजुरी परेपछि पक्राउ गरी म्यादथप गरी मुद्दा चलाइएको हो । उजुरीकर्ता ११ जनामध्ये डा. सन्दीप साहको ३८ लाख फिर्ता गरेको र बाँकी ११ जनाले मिलापत्र गरेकाले उनलाई छाडिएको हो । उजुरीकर्ताहरुले प्रतीकका बाबु, भाइहरुसँग सम्झौता गरेर उजुरी फिर्ता लिएकाले छाडेका हौं । फेरि उजुरी परे पक्राउ परिहाल्छन् ।’

सुजुकीका ९७ वटै गाडी लिलामीको ३५ दिने सूचना निकालिसकिएको छ । ३५ दिन बित्न एक दुई दिन बाँकी रहेको र ऋण असुली प्रक्रियामै रहेको हिमालयन बैंक भरतपुर शाखाका म्यानेजर कविन्द्र पाण्डेले नेपालफेसलाई बताए । म्यानेजर पाण्डेले सुुजुकीका बिक्रेता श्रेष्ठको ऋण रकम बताउन नमिल्ने प्रतिक्रिया दिए ।

बैंकले लिलामी प्रक्रिया अगाडि बढाइसकेको र ३५ दिने सूचनाको म्याद पनि सकिन लागेको छ । यस्तो अवस्थामा ३ महिनाभित्र गाडी नामसारी हुने कुरामा गाडी खरिदकर्ताहरुमा आशंका उत्पन्न भएको छ ।