१० करोड क्षतिपूर्ति मागेका भुवन केसीविरुद्धको मुद्दा जितेपछि रुँदै यस्तो भनिन् साम्राज्ञीले ?

काठमाडौं । १० करोड क्षतिपूर्ति माग दाबी गर्दै अभिनेता भुवन केसीले दायर गरेको गाली बेइज्जती मुद्दामा सफाइ पाएपछि चर्चित नायिका साम्राज्ञी राज्यलक्ष्मी शाहले आफ्नो नयाँ अध्याय सुरु भएको बताएकी छन् ।

सामाजिक सञ्जालबाट भावुक हुँदै अनुभव सुनाउँदा मुद्दा अदालतसम्म पुगेको स्मरण गर्दै उनले चलचित्र क्षेत्रमा आफूले भोगेको अनुभव सुनाउँदा समस्या आएको बताएकी छन् । “मैले मेरोचलचित्र यात्राबारे अनुभव साझा गरेको थिएँ, जुन तितो मिठो अनुभव थियो । सायद अरूको पनि यस्तै थियो कि ? तर कसैलाई हानी/चोट दिने मेरो उद्देश्य थिएन,” उनी अगाडि थप्छिन्, “मेरो उद्देश्य सबै युवालाई सन्देश दिनु थियो, तपाईंले आफ्नो सपना हासिल गर्न सक्नुहुन्छ । तर, त्यहाँ रहेका रक्तपिपासुहरूबाट बच्नुपर्छ ।”

आफूले आफ्नो दिमागमा भएको कुरा सार्वजनिक गरेको उनले बताएकी छन् । “त्यसैका लागि म विरुद्ध १० करोडको मुद्दा हालियो । त्यो व्यक्तिले मलाई म शक्तिशाली छु र चलचित्र क्षेत्रमा सबैको समर्थन छ भन्ने देखाउनु थियो । त्यो मलाई धम्क्याउने उसको तरिका पनि थियो,” इन्स्टाग्राममार्फत उनी कसैको नाम नलिई भन्छिन्, “कसैले आफ्नो अनुभव सुनाउन पनि नपाउने यो निकै डरलाग्दो प्रवृत्ति छ । अब केही कुराले मलाई आश्चर्यचकित बनाउँदैन ।”

तीन वर्षभन्दा लामो समय वकिलहरूले आफ्नोतर्फबाट मुद्दा लडेको भन्दै भावुक भएकी साम्राज्ञी रुँदै भन्छिन्, “यो यात्रा सजिलो थिएन । वकिलहरू अशांक मल्ल, दिनेश त्रिपाठी, दृष्टि दाहाल, राष्ट्र तिमिल्सिना र जयलाल भण्डारीले मेरा लागि लड्नुभयो । मैले जितेँ । अब बल्ल श्वास फेर्न पाउँछु । जीवनको नयाँ अध्याय सुरु गर्न पाउँछु । मलाई शुभकामना दिनुहोला ।”

शाहले सामाजिक सञ्जालमार्फत भुवन केसीले आफूलाई दुर्व्यवहार गरेको बताएकी थिइन् । उद्यपि, उनले सुरुमा भुवनको नाम लिएकी थिइनन् । उनले नाम नलिए पनि भुवनले जिल्ला अदालत काठमाडौंमा ०७७ साउन ९ गते गाली बेइज्जतीको मुद्दा दायर गरेका थिए ।

तर भुवनले दायर गरेको उक्त गाली बेइज्जतीको मुद्दामा न्यायाधीश वासुदेव पौडेलको इजलासले भुवनको दाबी नपुग्ने भन्दै शाहलाई सफाइ दिएको थियो ।