करिश्मा मानन्धर भन्छिन्- अब कमेडी गर्न चाहन्छु

काठमाडौँ । नेपाली चलचित्र क्षेत्रको एक चर्चित अभिनेत्री करिश्मा मानन्धरले आफूलाई अब कमेडी अभिनय गर्न मन भएको बताएकी छन् । करिब ४ दशक अभिनयमा बिताएकी उनले अभिनयमा प्रायः भूमिका निर्वाह गरे पनि कमेडी भने नगर्न नपाएको बताइन् । उनी नेपाली रजतपटमा सबैभन्दा सुन्दर नायिकाका रूपमा समेत चिनिन्छिन ।

‘चार दशक अभिनय यात्रामा बिताएकी छु । कमेडी बाहेकका प्रायः सबै भूमिका निर्वाह गरिसकेँ’, उनले भनिन्, ‘अहिले भने कमेडी अभिनय गर्ने रहर जागेको छ ।’ केही अगाडि एक विज्ञापनमा कमेडी भूमिका निर्वाह गर्दा पाएको चर्चाले कमेडी गर्ने रहर जागेको उनले सुनाइन् ।

‘विज्ञापनबाट ममा पनि कमेडी गर्न सक्ने क्षमता रहेको बुझेँ, अब कमेडी भूमिका पाए गर्छु,’ करिश्माले थपिन् । हुन त उनी यस अगाडि जितु नेपालको कमेडी सो ‘मुन्द्रे कमेडी क्लब’मा अध्यक्षका रूपमा देखिएकी छन् । शोमा आफ्नो काम थपडी बजाउने र हाँस्ने मात्र भएकाले मज्जा नआएको उनी बताउँछिन् । भनिन्, ‘प्रेमकथा, एक्सनदेखि सामाजिक कथासम्मको फिल्ममा भिजिसकेँ । अब कमेडीको अनुभव लिनु छ ।’

करिश्मा अभिनीत पछिल्लो फिल्म ‘बगान’ आगामी शुक्रबारबाट सार्वजनिक प्रदर्शनमा आउँदै छ । फिल्ममा उनले एकल महिलाको भूमिका निर्वाह गरेकी छन् ।