भारतीय फिल्म ‘आदिपुरुष’का लेखकले माफी मागे

काठमाडौँ। विवादित भारतीय चलचित्र आदिपुरुषका संवाद लेखक मनोज मुन्तसिरले माफी मागेका छन्। उनले हिन्दु धर्मावलम्बीहरूलाई चोट पुगेको भन्दै सामाजिक सञ्जालमार्फत माफी मागेका हुन्।

सामाजिक सञ्जालमा आज बिहान उनले लेखेका छन्, ‘म आदिपुरुष फिल्मबाट जनभावनालाई पर्न गएको चोट स्वीकार गर्छु, मेरा सम्पूर्ण दाजुभाइ दिदीबहिनी,आदरणीय ऋषिमुनि तथा श्रीरामका भक्तजन सबैसँग हात जोडेर निःशर्त माफी माग्छु।’

फिल्म आदिपुरुष प्रदर्शनमा आएलगत्तै यसमा राखिएका दृश्य तथा संवादलाई लिएर नेपाल तथा भारतभर चर्को विरोध भएको थियो। फिल्ममा समावेश धेरैजसो दृश्यले रामायणको उपेक्षा गरेको त्यसका पात्रहरूलाई गलत ढंगले अर्थ्याइएको थियो।

नेपालकी छोरी सीतालाई भारतमा जन्मिएको भन्ने संवाद राखिएको भन्दै काठमाडौँलगायत देशका केही मेयरले फिल्ममाथि प्रतिबन्ध लगाएका थिए।

तर मुन्तसिरले फिल्मको संवादबारे भने कुनै उल्लेख गरेका छैनन्। रामायणको उपहास गरिएको प्रसंगमा मात्रै उनले माफी मागेका छन्।