ड्रागन बोट रेसको उपाधि चीनकै सिचुवानलाई

पोखरा। पोखरामा शुक्रबारदेखि सुरु भएको ‘नेपाल-चीन ड्रागन बोट रेस फेस्टिबल’ को उपाधि चीनकै सिचुवान ड्रागन बोटले हात पारेको छ।

आज भएको फाइनल स्पर्धामा २ र ५ सय मिटरको उपाधि सिचुवानले हात पारेको हो।

दुवै विधामा सिचुवानले नेपाल एसोसिएसन अफ राफ्टिङ एजेन्सी (नारा ड्रागन बोटरेस) लाई पराजित गरेको हो।

उपाधि विजेता सिचुवानले दुवै विधामा ५ लाख ५० हजार रुपैयाँ नगदसहित ट्रफि प्राप्त गरेको छ।

उपविजेता बनेको नाराले दुवै विधामा ३ लाख ५० हजार रुपैयाँमा चित्त बुझाएको छ।

चीनको युनान ड्रागन बोटले नेपालको एनआरसिए ड्रागन बोटलाई पराजित गर्दै दुवै विधामा तेस्रो स्थान हासिल गरेको छ।

युनानले दुवै विधामा २ लाख रुपैयाँ हात पारेको छ। नेपालको ४ र चीनको ४ गरी ८ समूहले प्रतियोगितामा सहभागिता जनाएका थिए ।

शुक्रबार पहिलो चरणको खेलबाट ४ टोली बाहिरिए। प्रतियोगितामा सहभागी सबै समूहले १-१ लाख रुपैयाँ प्राप्त गरेका छन् ।

विजेता खेलाडीलाई राष्ट्रियसभा अध्यक्ष गणेशप्रसाद तिम्लिसिना, नेपालका लागि चिनियाँ राजदूत छन् सोङ, पर्यटन राज्यमन्त्री सुशिला श्रीपाइली ठकुरी, पोखरा महानगरपालिका मेयर धनराज आचार्य, उपमेयर मञ्जुदेवी गुरुङ लगायतले पुरस्कार प्रदान गरे ।

चीनको करिब २ हजार वर्ष पूरानो मौलिक पर्व ड्रागन बोटरेस फेस्टिबल दक्षिण एसियामै नेपालमा पहिलो पटक मनाइएको हो।

बोटरेसका लागि चीनबाट केरुङ नाका हुँदै फाइबारका विशेष डुंगा ल्याइएकाे थियो। ती डुंगा चीनले पोखरा महानगरपालिकालाई हस्तान्तरण गरेको छ।

नेपाल पर्यटन बोर्ड, चिनियाँ दूतावास र पोखरा महानगरपालिकाले फेस्टिबलको आयोजना गरेको हो। पोखरा पर्यटन परिषद् र चाइना ओभरसिज एसोसिएसन फेस्बिटलको सहआयोजक हुन्।