उपप्राध्यापक प्रेम चलाउने त्रिविमा बसे आमरण अनसन

काठमाडौं । त्रिभुवन विश्वविद्यालयका उपप्राध्यापक प्रेम चलाउनेले आमरण अनसन सुरु गरेका छन् । चलाउनेलाई कुटपिट गरेका नेविसंघ नेताहरुको मुद्दा फिर्ता लिने निर्णयका विरुद्धमा उपप्राध्यापक चलाउने त्रिवि उपकुलपतिको कार्यालयमा आमरण अनसनमा बसेका हुन् ।

जिल्ला अदालत काठमाडौंमा धर्ना बस्न खोज्दा प्रहरीले धपाएपछि उपप्राध्यापक चलाउने त्रिविमा अनसन बसेका छन् ।

करिब ३ वर्ष अगाडि उनलाई नेविसंघका कार्यकर्ताले कुटेर घाइते बनाएका थिए । कुटपिट गर्नेमाथि चलाएको मुद्दा फिर्ता लिने सरकारको निर्णयको विरोधमा अनसन सुरु गरेको उनले बताए ।

कांग्रेस नेता बालकृष्ण खाँण र कृष्णप्रसाद सिटौलाले लाख कोसिस गर्दा समेत मन्त्रिपरिषदमा लान नसकेको यो मुद्दालाई वर्तमान सरकारले सजिलै फिर्ता लिएको उनको आरोप छ ।