खतिवडालाई अर्थमन्त्रीबाट हटाउन ६ भाइको मोर्चाबन्दी

काठमाडौं । अर्थमन्त्री डा. युवराज खतिवडालाई हटाउन वामदेव गौतमको राष्ट्रियसभा जाने अतिसय चाहना एक कारण भए पनि प्रधानमन्त्री केपी ओलीकै निकट नेताहरु उनलाई हटाउने खेलमा बढी लागेको खुल्न थालेको छ । महाभारतमा अभिमन्यूजस्तै मन्त्री खतिवडा नेकपाभित्रका प्रधानमन्त्री ओली निकटकै नेताहरुको घेरामा परी हटाइएका छन् । नेकपा निकट स्रोतका अनुसार खतिवडालाई सत्ताको रिङबाट बाहिर पुर्याउन ओली निकटका नेता र ठूला बिचौलियासमेत सक्रिय थिए । उनलाई हटाउन ६ भाइको मोर्चा बनेको थियो । यो मोर्चाले नै उनलाई हटाउने ग्रान्ड डिजाइन तयार गरेको चर्चा सिंहदरवारदेखि बालुवाटारसम्म हुने गरेको छ ।

मन्त्री खतिवडालाई हटाउन  नेकपाका महासचिव बिष्णु पौडेल, नेकपा संसदीय दलका उपनेता सुवास नेम्वाङ, प्रधानमन्त्रीका मुख्य सल्लाहकार बिष्णु रिमाल, ब्यापारी विनोद चौधरी, अजयराज सुमार्थी र दीपक भट्ट नै लागेका थिए ।

२०७४ फागुन ३ मा केपी ओली सरकार गठन हुनासाथ महासचिव पौडेल आफैं अर्थमन्त्री हुनतिर लागे । तर उनी पटक पटक मन्त्री भइसकेकाले मापदण्डमा अटाउन नसकेपछि अरु राजनीतिक नेतालाई भन्दा खतिवडालाई अर्थको बागडोर सुम्पिएर पर्दापछाडिबाट आफूले मन्त्रालय चलाउन सकिने निष्कर्षका साथ उनलाई बनाउनतिर लागे । खतिवडालाई बनाएपछि आफूले भनेअनुसार परिचालन गर्न सकिने ठम्याई उनको थियो । तर खतिवडाले मन्त्री भइसकेपछि पौडेलले भने अनुसारका काम गरेनन् । विभिन्न ब्यापारीक समूहको स्वार्थ अनुकूलका निर्णय गर्न अस्वीकार गरे । महासचिव पौडेलले भनेबमोजित चल्न तयार नभएपछि खतिवडासँग उनी भित्रभित्रै रुष्ट भएका थिए । महासचिव पौडेलले नै राष्ट्रियसभामा जाने चाहना त्यागिसकेका वामदेव गौतमलाई उकासेर पुनः जाने वातावरण तयार गरी युवराज खतिवडालाई आउट गर्ने बातावरण तयार गरेका थिए ।

 मुख्य सल्लाकार विष्णु रिमालले अरु मन्त्रीलाई जस्तो काबुमा राख्ने प्रयास अर्थमन्त्रीलाई पनि गरे । तर उनको सिधै पहुँच प्रधानमज्त्री ओलीसँग भएकाले रिमाल पनि उनीसँग भित्रभित्रै चिढिन पुगेका थिए । अर्थतन्त्रका जानकार खतिवडा प्रधानमन्त्रीका निकट हुन पुगेकाले रिमालको जरुरत उनलाई पर्ने कुरै भएन । अर्थमन्त्री खतिवडाको अगाडि रिमाल मरिच चाउरिएझैं चाउरिएर बसे । वामदेव गौतमलाई राष्ट्रियसभामा लानुपर्छ भनेपछि उनी पनि भित्रभित्रै खतिवडा हटाउनका लागि वातावरण तयार गर्न सक्रिय भएका थिए । यद्यपि खतिवडा हटिसकेपछि उनी सामाजिक संजालमा उनी योग्य थिए भन्दै गोहीको आँसु चुहाउन भ्याइसकेका छन् ।

 सुवास नेम्वाङले अर्थमन्त्रालयमा विभिन्न नियुक्ति र सरुवाको सूची दिएको तर ती कतिपय पूरा हुन नसकेपछि उनी पनि खतिवडाको विकल्प खोजीमा थिए ।

विनोद चौधरीले गलत बाटोबाट नविल बैंकको अरबौं रकम विदेश लगेकोबारेमा राष्ट्रबैंकबाट पत्र काट्न लगाएको प्रतिशोध साँध्ने उपयुक्त ताकमा थिए । त्यो मौका उनले पनि खेर जाने दिने कुरै भएन ।

अजयराज सुमार्गीको भर्जिन आइल्याण्डबाट नेपाल भित्रिएको स्रोत नखुलेको ११ अर्बमध्ये बाँकी ३ अर्ब रुपैयाँ निकासा हुनसकेको छैन । उक्त रकम निकासाका लागि अर्थमन्त्री खतिवडा साकारात्मक नभएकाले उनी पनि रुष्ट थिए । दीपक भट्टका विभिन्न ब्यापारीक स्वार्थ पूरा नभएको र त्यसमा अर्थमन्त्री बाधक भएकाले उनी पनि बिरोधमा थिए । भट्टलाई गौतम निकट विवादित ब्यापारीका रुपमा चिनिन्छ । चौधरी, सुमार्गी र भट्टले खतिवडा हटाउने डिजाइनमा हरतरहले मद्दत गरेका थिए ।